Deg ass n 05 deg ayyur n furaṛ n useggas-agi n 2020, i d-yettwasiẓreg wammud {Recueil} n tullisin n massa Rabḥa Aïssou. Tefka-as azwel : « Timeṛǧiwt ». D wa i d adlis-ines amezwaru ara d-tessuffeɣ. Yeffeɣ-d ɣer uxxam n teẓrigin n Ɛeccab, di Tizi Wezzu.
D adlis deg i d-ddan-t tẓa (09) n tullisin yemgaraden, yal tullist s tedyant-is. Gar-asen-t izwal-agi: Lemri, Tiziri, Timerǧiwt, Tameɣra, Ttxil-k a mmi… d tiyaḍ. D adlis i yettnuzun di tnedlsin n tmurt Taqvaylit, Yewweḍ ula ɣer tmurt Fransa.
Send ad yeffeɣ wammud-agi, tella tettaru seg tikkelt ɣer tayeḍ deg tesɣunt « Tamaziɣt tura » n Useqqamu Unnig n Timmuzɣa.
S wammud-agi n Timeṛǧiwt, massa Ɛissu, tra a d-tṣiweḍ tiɣri n tlawin i wumi yettwakkes wawal di tmetti-nsen-t.
Agzul ɣef tmeskart :
Tlul massa Ɛissu deg useggas n 1968, di tmurt n Yiqvayliyen. Teɣra di tesdawit n Mulud Mɛemmri, deg Tizi Wezzu, syin i d-tewwi agerdas deg tsekla n taɛravt.
Deg useggas n 1994 i teffeɣ tamurt, tewwi avrid n yinig. Tres di Lpari. Din i tettidir ar ass-a. Telha-d d ulmad d tɣuri n tsekla tafransist, akked tsekliwin n tmura nniḍen. Amahil-ines deg inig d aḥric yerzan asegmi asmuzgan {éducation spécialisée}
Maca ur teǧǧi ara Taqvaylit-is, tefka-as azal d ameqqran, tezga teqqaṛ-itt, theddeṛ-itt, mi tewḥel di kra ad testeqsi. Akka armi tessaweḍ ula d nettat tessuffeɣ-d adlis-ines s tutlayt n yimawlan-is.
Ugar aya tamyarut Rabḥa tettṛuḥu ɣer temliliyin i d-yettilin ɣef tsekla, d wayen yerzan tamurt taqvaylit. Texdem kra n temliliyin n uznuzu s uvuddu, akked d usarag ɣef udlis-ines di yulyu yezrin, di Lpari.
