Yenna unaẓur Lwennas Meɛtub, deg yiwet seg tezlatin-is: « …Ma d lǧernan n lezzayer / Amek i da-ɣyeḍher / Ma am zik neɣ ibeddel udem / Ur umineɣ ad d-icekker / Siwa ma s ccer / Ɣef lmut n Sliman Ɛazem. »
Dda Sliman, akken i s-ssawalen tugget n Yiqbayliyen, ilul deg ass n 19 deg ayyur n ctambeṛ n useggas 1918 di Tala n Tdekkart i yeṭṭafaren Agni n yeɣran {Agouni Gueghrane} i d-yezgan deg lɛerc n Yiwaḍiyen, agezdu n Tizi Wezzu.
D acennay aqvayli, d amẓawan {Musicien}, d ameskar {Auteur}, d amedyaz, d win ixeddmen tineqqisin {Fables}. Yesdukel-iten-t akk. Ur yeǧǧi yiwet.
Di taggara n yiseggasen n 40 i yevda icennu ɣes usayes, d netta i ixeddmen iḍrisen d uẓawan i yiman-is. Ma deg useggas n 1951 yessuffeɣ-d aḍevsi-ines amezwaru s wudem unṣiv, tedda-d deg-s tezlit-ines i yettwasnen nezzeh « A muḥ a muḥ« . Yerna-d deg useggas n 1955 yessuffeɣ-d « Ffeɣ ay ajṛad tamurt-iw« . D tizlit i tegdel temharsa Tafṛansist seg akk imaṭṭafen-is.
Seg useggas n 1962 mi tveddel temharsa Tafṛansist s tin n Taɛravt, mmi-s n Ugni Yeɣran icennu mgal wid yeṭṭfen adavu, am Benbella d Bumedyen.
Tisfifin-ines ttnuzunt s ddaw ufus, acku yettwagdel di tmurt, ugin-as ad yekcem. Dɣa yeqqim d iminig di tmurt n medden. Yesveṛ i lḥif, yedder s nnif. Di tallit-nni yettɛedday-d anagar deg umaṭṭaf n « Radio Paris » di tedwilt « Kabylie mon beau pays » i yesselḥay mas Ḥamid Ḥamisi.
Deg useggas n 1970 netta akked Nuṛa yettunefk-asen uḍevsi n wuṛeɣ {Disque d’or}, kra n wakud yekki di tseqqamut i yettḥaraven ɣef yizerfan n yicennayen d yinaẓuren s umata « SACEM ». Syin d afella yemlal d Ccix Nureddin, aṭas ixedmen akken, cnan ula s tefransist.
Di tazwara n yiseggasen n 80 yuɣ axxam d wakal n tfellaḥt di tɣiwant n Moissac, yezga din, yelha-d d tevḥirt, almi d ass n 28 yennayer 1983 i yeffeɣ yiziɣer-is, yewwi-t wass-is, ɣef teɣzi 65 n yiseggasen deg tudert-is. Yemmut ur d-yeǧǧi imwerten.
Ass-a ɣas zrin 37 n yiseggasen ɣef lmut-is, 102 ɣef tlalit-is, maca mačči d win ttun medden, mazal tizlatin-is d tinagiyin. Mazal ttuɣalent-as tejmilin, ama di tmurt Taqvaylit neɣ deg inig. Ffɣen-d fell-as yidlisen, ttwaxedmen-t ɣef tẓuri-is tezrawin. Rezzun medden ɣer uẓekka-s.
Di 2008 taɣiwant n Moissac tefka isem n yiwen n wadeg {Place} ɣef yisem-is. Ma deg tagara n 2013 taɣiwant n Lpari tegzem-itt di ṛṛay-is, tefka isem n yiwen n umḍiq i yellan di 14e arrondissement ɣef yitri n tezlit Taqvaylit.
