D adlis-ines wis sḍis. Yeffeɣ-d deg useggas n 2019 ɣer uxxam n teẓrigin n Ccix Muḥend Ulḥusin, i yellan deg iɣrem n Tizi Wezzu. D adlis i wumi yefka umaru azwel « Iziran n temẓi », yevḍa-t ɣef 64 n yisevtar. Unuɣ n tjellavt {Illustration} yella-d s lmendad n unaẓur Kamal Benṭaḥa.
Ddan-d deg-s kraḍ n tneqqisin d snat n tullisin, akked d 14 n yiḍrisen yemgaraden.
Awal ɣef umeskar:
Fahim Mesɛudan (Fahim Messaoudene), d yiwen n ilemẓi i d-tefka tmurt n Yiqvayliyen. D mmi-s n taddart n Igersafen, i yeṭṭafaren temnaḍt n At Yeǧǧeṛ. D amedyaz, d aneɣmas d aneggal. D tutlayt-is Taqvaylit i yefren yimru-is.
D win i d-yekkren deg umussu asduklan, yeqdec deg-s xilla, yella d aɛeggal deg aṭas n tiddukliwin tidelsanin. Yekki deg ddeqs n leqdicat d temliliyin.
Deg useggas 1999 yura yiwet n tceqquft n umezgun, yefka-as azwel : « Ar melmi ara idum waya ? ». Deg useggas n 2018, yewwi arraz n tsekla « Muḥemmed Dib » s wungal-is « ANZA ».
Fahim yettaru imagraden s teqvaylit i uɣmis « Tiɣremt » send ad yeḥves uneggaru-agi. Yettaru daɣen i Uɣmis n Yimaziɣen, d kra n tesɣunin. Akken daɣ i yesselḥay yiwen n ublug.
Idlisen i d-yessuffeɣ:
– Tiyersi, d ammud n tmedyezt, 2013
– Timsirin n ddunit, d ammud n tneqqisin d tullisin, 2014
– Asadel, d ammud n tmedyezt, 2015
– Anza, d ungal, 2016
– Izlan n tlawin, d ammud n yisefra n tlawin, 2017
– Iziran n temẓi, 2019
