Meẓyan Racid s yisem-is n tidet Mḥemmed Yeɛla, ilul deg ass n 27 n wayyur n furaṛ, aseggas 1944 di Lqeṣba (Casbah d’alger). Tawacult-is akked jida-s unagen-d ɣer Lezzayer lewhi n useggas 1920, seg taddart n At Yeḥya i yeṭṭafaren taɣiwant n Uẓeffun ass-a.
Anaẓur Racid d win i d-yekkren deg yiwet n twennaḍt n uɣaniv n cceɛbi. Maca aya-gi ur as yekkis ara leṣnaf-nniḍen n tezlit neɣ d aẓawan.
Ɣer jida-s i d-yelmed aṭas n tɣawsiwin tiqvuṛin d wanysayen iqvayliyen igejdanen. S yes-s i yessen leḥmala n yidles n teqvaylit, d wazal-is. Sɣur-s i d-yelmed inzan, d tmucuha, d yisefra iqvuṛen.
Deg useggas n 1958 yekcem ɣer umaṭṭaf n teqvaylit, din i yexdem tidwilin netta akked unaẓur Ccix Nuṛeddin.
Deg useggas 1962 yekki ɣer yidis n Crif Xeddam deg tedwilt iɣennayen n uzekka. Di tallit-agi yexdem kra n tezlatin i netta, akken daɣ i yefka tiyaḍ i Ḥsen Mezzani d Ḥsisen.
Di tallit-agi n yiseggasen n 60 i yewwi avrid n yinig ɣer Fransa. Yexdem deg umaṭṭaf n Lpari (Radio Paris) ɣer tama n Ɛemrawi Misum i yellan d tayett i yinaẓuren iqvayliyen deg inig, gar-asen: Ɛellawa Zerruqi, Xdiǧa, Walṭac Arezqi, Sliman Ɛazem, Muḥemmed Saɛid, d wiyaḍ.
Syin akin yexdem tizrawin deg uḥric n umezgun (études de théâtre). Dɣa yelha-d d uḥric-agi di radyu. Mi d-yuɣal ɣer tmurt yeqdec nezzeh deg umaṭṭaf wis sin, akked Mhenna, Nwaṛa, Acṛuf Yidir, d Zeɛmum.
Tuggett n tezlatin akk i yecna Sami Lǧazayri s Teqvaylit d Racid Meẓyan i ten-t-yuran. Yefka iḍrisen daɣen i waṭṭas nniḍen, gar-asen: Nwaṛa, Yusef Abǧawi, Ǧamal Cir, Qasi Abǧawi, Ǧamal Ɛellam, Naṣer Ziyuc, Lǧida, Idir, Mǧahed Ḥamid, Buɛlam Caker, d wiyaḍ. Yexdem tizlatin ula s tefransist, yefka yiwet i Vincent Spoutil yecna-tt.
Mḥemmed Yeɛla, d yiwen i d-yeǧǧan agerruj ur nkeffu, imi d win yuran azal n 1000 n yidṛisen n tezlatin, ugar 20 n tceqqufin n umezgun n radyu, tidwilin, d tesgilin n wuraren, akken daɣ i yeḥrez kra n leqdicat n Sliman Ɛazem d Ɛellawa Zerruqi, ar tura ur d ffiɣen ara.
Rnu ɣer waya yeǧǧa-d 300 n yiḍrisen ur yessin yiwen, ur d ffiɣen ara (inédits).
Deg useggas n 2008 yettwet s wayen yettwasnen s yisem n « AVC », terra-t iteddu ɣef tcariṭ. Anaẓur d win i yemmuten deg ass n 09 tuver n useggas 2015, ɣef tudert n 71 n yiseggasen.
