Iverreḥ-d yilemẓi amaru d uneɣmas Mhenni Xalifi s usenfar-ines amaynut, deg yiwen n wulɣu i d-yessers deg umiḍan-ines n facebook ass n 10 di tuveṛ. Yenna-d deg kra n wussan ɣer zdat ad d-yeffeɣ udlis-ines ɣer teẓrigin Ccix Muḥend Ulḥusin, i ɣef yella umedyaz Mebarek Gamar ɣef uqeṛṛuy-nsen-t.
D adlis i yura yilemẓi n Ayt Smaɛel s tutlayt taqvaylit. Yefka-as azwel: « Zeddak Mulud, Tamḥaddit d tmedyezt ». Akken i d-yeqqaṛ wulɣu ad d-tafem deg-s :
– Tiɣuriwin ɣef tuget n yisefra n umennuɣ n Zeddak Mulud.
– Isefra akk i yecna seg 1983 ar ass-a.
– Tadiwennit taffeɣmenzut{Inédite}, d wayen nniḍen.
Di tggara n wulɣu vav n wungal « Imehbal » yessenmer anaẓur amḥaddi Lmulud Zeddek, ɣef tallelt i as-d-yefka, i wakken ad yessali umaru asenfar-is. Akken daɣ yessenemer anemhal n teẓrigin n Ccix Muḥend Ulḥusin i as-d-yeldin tiwwura tal tikelt ama i tallelt neɣ i usiẓreg.
