Deg iseggasen-agi ineggura yuzzel wawal nezzeh deg tmetti taqvaylit, akked yizeḍwa inmettiyen, ladɣa di facebook, ɣef unelmad Ǧemɛa Ɛabid i iɣaven 45 iseggasen aya ur d-ivan.
Talalit-is
Ǧemɛa Ɛabid, ilul deg useggas n 1954, di taddart n Tiwal, lɛeṛc n At Mɛuc, agezdu n Vgayet, deg tmurt Taqvaylit. Yella d anelmad deg useggas-ines amezwaru deg usuddu n tezrawin tisertanin, di temdint n lezzayer. Akken daɣ i yettwassen s umecwar-is n timmeɣnest ɣef tnekkit yidles d n yigduden Imaziɣen.
Tadyant-is
Seg useggas n 1975 ur d-ivan later-is, yiwen ur yeẓri ma yedder neɣ yemmut. Yal yiwen akken iheddeṛ, ma d tidet yečča-tt yeɣẓer. Deg useggas-agi yakan, tasdawit n lezzayer tenced-d aselway n tallit-nni Hwari Bumedyen ɣer yiwet n temlilit.
Aneggaru-agi yexdem asarag i yinelmaden, di tagara mi yekfa, yefka awal i yinelmaden, ma yella wacu ara d-inin neɣ ad d-fken tamuɣli-nsen. Dɣa ilemẓi Ǧemɛa Ɛabid, yessuter ad d-imeslay, fkan-as awal. Yenna i uselway n lezzayer: « Aya dṛa ad d-yas wass i deg ara nɣeṛ tutlayt-nneɣ deg iɣervazen d tesdawiyin n tmurt ? »
Bumedyen iḥar ɣef yilemẓi, yewhem amek armi i t-yesteqsa yerna war akukru, zdat wanect-nni n yisdawanen, ur t-yugad ara. Aselway yewwet nneḥ, ur as-yerri ara ɣef usteqsi-ines i unelmad. Ɛeddan sin n wussan ilemẓi anelmad ulac-it. Amzun tečča-t lqaɛa.
Ɣef akken i d-llan-t tnagiyin, nnan-d yettwanɣa, tafekk-as tettwaḍegger ɣer levḥer, ččan-t yiselman. Maca icenga n timmuzɣa ssuffeɣen-d fell-as awal d akken iman-is i yeɣli, neɣ d netta i yekfan ussan-is. Dacu kan iɛeggalen n twacult-is, wid i t-yesnen d yimeddukal-is ugin ad amnen taqsiḍt-agi, tugi ad sen-tekcem s aqeṛṛu, acku snen aniwa i d Ɛabid Ǧemɛa, ẓran belli d awezɣi ad yexdem tigi.
Yenna Lyazid Menṣuri i yefkan isem n Ǧemɛa Ɛabid i yiwen n uɣervaz uslig: Jida fell-as talwit, tezga tessaram, yiwen n wass ahat ad as-tekkeḍ ɣef yimi n tewwurt n texxamet-is. Ula d nek ur gzimeɣ ara asirem, qqareɣ-as ad ki-sineɣ a xali. Zrin yiseggasen, yewweḍ-d useggas n 1982 anaẓur amḥaddi Lwennas Meɛtub yuɣal-d s yiwet n tesfift (K7), yeqqaṛ-as deg yiwet n tezlit:
« Ttxilek a si lkumṣar
Anda akka i as-tebram i mmi
Lukan daxel n lebḥer
Ad t-id-ḍeqqrent lemwaji
… »
Aṭas i d-yeqqaṛen belli tizlit-agi, ixdem-itt d tajmilt i unelmad ameɣnas Ǧemɛa Ɛabid. Maca akken yeqqaṛ yiwen n yinzi: « ffer ffer, yiwen n wass ad iferfer ». Akken tra tɛeṭṭel taluft, tidet ad tvan.
