Uvellil Buɛlam, d yiwen n yilemẓi, d amedyaz s tutlayt n Teqvaylit, ilul deg useggas n 1981, deg Uviẓar n At Jennad. Deg useggas n 2018 yessuffeɣ-d sin n wammuden n yisefra, s yizwal: “Tatut d usmekti” akked “Tawwurt”, ɣer teẓrigin Ccix Muḥend Ulḥusin, di Tizi Wezzu. Neqsed-it s tumert i d-yerra ɣef yisteqsiyen.
Vava Innova : Deg tazwara, ini-d i yimeɣriyen, anwa i d Uvellil ?
Azul, nekk isem-iw Buɛlam Uvelli, luleɣ deg ass n 02 yevrir n useggas 1981, deg taddart n Uviẓar. Aviẓar, d taddart i yettafaṛen lɛerc n At Jennad, deg tɣiwant n Tmizar. Agezdu n Tizi wezuu. Deg useggas n 2000 almi d 2004 lliɣ d asdawan. Ḍefreɣ tasekla d tutlayt tafransist deg tesdawit n Dda Lmulud n At Mɛemmeṛ, syin akin xedmeɣ asileɣ deg wayen yerzan tadbelt d uselḥu n yisensuyen. Akka tura aqli-i d anemhal n yiwen n usensu.
Uvellil Buɛlam : Amek i d-tufiḍ iman-ik deg unnar n tmedyezt ?
Tamedyezt, deg asmi lliɣ d amecṭuḥ imir-nni ahat ad sɛuɣ 12 neɣ 13 n yiseggasen deg tudert-iw. Di tallit-nni ttaruɣ kan i yiman-iw, ur as fkiɣ ara azal, yerna mẓiyeɣ, d asexerbubbec kan.
Uɣaleɣ akken-nni kra n wakud ḥebseɣ akk tira, maca amek akken-nni tura, tal tikkelt ttafeɣ-d iman-iw ttuɣaleɣ-d ɣer ɣur-s, ɣas akken ur d cliɛeɣ ara deg-s. Amzun akken d taɣawsa tella deg allaɣ-iw d wul-iw, tezga tjebbed-iyi ɣur-s.
Zik-nni am yilmeẓiyen kan tezriḍ amek ! d acu iceɣben ilmeẓi n 18 n iseggasen ! d tayri. Syin dafella, εawdeɣ serseɣ imru, imir-nni wteɣ atas n yiseggasen mačči uriɣ ula d ttren, ladɣa mi akken i vdiɣ axeddim deg uḥric n tmerrit. Akka.
Γef acu i tḥemmleḍ ad tsefruḍ ?
Ḍefreɣ abrid n tmedyezt tamḥaddit (Taqbaylit, tutlayt, amezruy, d umennuɣ). Ufiɣ iman-iw deg uvrid-agi nezzeh. Ẓerreɣ-tt d allal swayes i d-fkiɣ tazemert-iw i umennuɣ ɣef tnekkit-nneɣ yettwagezren acḥal d iseggasen aya.
D acu kan ɣas wwiɣ-d abrid-agi n temḥaddit, ttaruɣ ɣef yisental nniḍen, am : tayri, timetti, lḥif d wuguren i icudden ɣer tudert n wemdan, d waṭas n yisentalen nniḍen. Ma yehwa-ak yal asentel nettaru fell-as.
Da tesmektaḍ-iyi-d yiwet n tedyant teḍra-yi mi lliɣ d anelmad deg uɣerbaz amenzu n taddart-iw, imir-nni sɛiɣ 10 n yiseggasen deg tudert-iw. Cfiɣ amzun d ass-a imi nɣan yiwet n tgejdit n yidles-nneɣ, wa d Dda Lmulud n At Mɛemmeṛ. Nnana-aɣ-d yiselmaden ɣas ruḥet s ixxamen-nwen, ur teqqarem ara, acku yewweḍ-aɣ-d yisalli, d akken nɣan Dda Lmulud.
Yerna ɣas akken ur t-ssineɣ ara, ruɣ fell-as. Akken d amecṭuḥ iɣaḍ-iyi lḥal ɣas deg tallit-nni ur ẓriɣ ara anwa-t, ur ssineɣ ara azal-is. Maca ṛuḥ ay akud as-d a wayeḍ, atan yewfa-yid deg uvrid n tmedyezt tamḥaddit.
Ihi am akken avri- agi n tmedyezt tamḥaddit neɣ n umennuɣ s umata yeddad yid-i deg yidamen, amaken iy as-yenna Dda Lwennas deg awal-is: “Imi i d lulleɣ d Aqbayli isem-iw imenɣi.”
D acu i d uguren i d-tufiḍ deg unnar-agi n tmedyezt ?
Uguren ḥala widak, aql-aɣ la nettaru, ma d asufeɣ ulac. Ugur ameqṛan amenzu d tiẓrigin, yewɛer mliḥ akken ad tafeḍ imsiẓreg. Llan kra ma tenniḍ-asen s Teqbaylit i riɣ ad d-sufɣeɣ, din din ad nedlen fella-k tiwwura. Syin ma tesɛiḍ zzheṛ tufiḍ ad k-id-teker ɣlayet. Yerna akka bla ma nenna-d ɣef uznuzu d uzuzzer.
Sufɣeɣ-d sin n wammuden n tmedyezt deg tuber 2018, amenzu kfiɣ-t deg 2010, wis sin deg 2012. Kra n win uɣuṛ ruḥeɣ ad a yi-d-yini : « kkes ugur, ad nwali, … » keč ad tenwuḍ d ayen tefra. Ma d netta ad idawaṛ yes-k seg wayyur ɣer wayeḍ, mi testeqsaḍ amek a flan, ad ki-d yettales tiqulhatin. Akka, d aya i d-yiğğan armi d aseggas n 2018, acku ulac ixxamen n teẓrigin ara d-yelhin d umaru Aqvayli. Maca tura gerzzent tlufa ɣef yimir-nni.
Ugur wis sin d at tinedlisin, imi ttagin ad aɣen neɣ ad ṭṭfen adlis n Teqbaylit. Yiwet n tikkelt deg Tizi Wezzu, wwiɣ ammuden-iw deg sin, zziɣ-d i tnedlisin n temdint i wakken ad ten serseɣ, tezriḍ, yiwen akken yesɛa tanedlist, yenna-yi-d : ‘’awah sḥasfeɣ a mmi-s n tmurt, ur zmireɣ ara d ṭṭfeɣ idlisen n Teqbaylit. Acku ur teddun ara, … ‘’
Ugur wis kraḍ, din i terwi, d agejdur, imi imdanen drus i yeqqaren idlisen, tugar ma s Teqbaylit. Yiwen n yimsiẓreg yenna-yi : ‘’sel-iyi ad ak-weṣṣiɣ, fiḥel ad taruḍ s Teqbaylit akk, d akud-ik i tesruḥuyeḍ , aru s tefransist ay axir … ‘’ Nniɣ-as : ‘’ mačči d allalen neɣ d tamusni i ur sɛiɣ ara iwakken ad sxerbubceɣ s tefransist. Yerna ur sriɣ ara i yiwellihen am wi…’’. Twalaḍ amek ! Гer ɣur-i tira s Teqbaylit di tazwara d amennuɣ. D allal swayes seḥbibireɣ i uḥraz n tutlayt-nneɣ tagejdant. Iwakken daɣ ara teddu ɣer sdat.
Anwaten yimedyazen n teqvaylit d yiverraniyen i ɣer tmaleḍ ?
Amedyaz ameqṛan ‘’Si Mḥend U Mḥend’’, dɣa ammud amenzu i yuriɣ rriɣ-t d tajmilt i netta. Deg-s uriɣ 170 n yisefra s uɣaniv-ines. Ḥemmleɣ nezzeh tamedyezt-ines. D agerruj n Teqvaylit, d talsa s umata. Amer mačči d netta dili ur nesɛi ara tiktiwin d tugnatin ɣet tudert d tallit-nni i deg yedder d wayen i d-yecfa. Гer ɣur-i Si Muḥ d anmezray d amesnametti. D ameqṛan gar yimeqṛanen, am Baudelaire, Ronsard, Brecht, Goethe, … d wiyaḍ.
Syin yella Muḥya, ḥemmleɣ-t nezzeh, ama d aɣanib-ines, neɣ leqdicat-is. Yella daɣen Ben Muḥemmed i ẓareɣ d ameqqran n yimedyazen deg tallit-a deg i nella. Rnu ɣer waya am tugget n Yiqbayliyen, ḥemmleɣ anaẓur-nneɣ amḥaddi Dda Lwennas Meɛtub. Segmi lliɣ deg uɣervaz alemmas ara ass-a ulac ass deg ur selleɣ ara xerṣum i yiwet seg tezlatin-ines. Seg mi i t-nɣan yicenga, tegguğel tezlit Taqvaylit. Ur tettuɣ ara Dda Sliman Ɛazem, ula d netta aṭas i yeqdec. Lewnis Ayt Mengellat d acennay u d amedyaz ameqṛan, d aɣervaz. … Lḥaṣun ddeqs i nesɛa, yal yiwen s yisem-is, d wazal-is.
Ma d imedyazen iveṛṛaniyen, ḥemmleɣ: Baudelaire, Molière, Guillaume Apollinaire, Paul Élouard, Mofdi Zakarya, Mahmoud Derwich, … d wiyaḍ. D acu i ḥemmleɣ daɣen ! d ifiluzufen igrikiyen iqvuṛen am: Platon, Socrate, Epicure, Démocrite, … d wiyaḍ.
D acu d isenfaṛen i tesɛiḍ sya ɣer zdat ?
Isenfaṛen llan, akka tura atan kfiɣ 05 n wammuden n tmedyezt, seɣtiɣ-ten, ttrajun ass deg i ara d-walin tafat. Asenfaṛ-iw amenzu, aqli-i ttɛaraḍeɣ amek ara d saẓergeɣ xerṣum sin seg-sen, deg useggas-agi n 2020, ɣas ma ḥercawet teswiɛt. Гas akken mačči d ayen isehlen, imi imenza-nni-inu mazal ur nzin ara. D ugur ameqṛan n tedrimt, d uɣvel n teẓrigin akken i d-nenna yakan. Asenfaṛ wis sin, d aheyyi n yiwen n uḍevṣi n yisefra s uaẓawan ara xedmeɣ nekkini. Akken daɣ i vdiɣ tira n yiwen n wungal s Teqvaylit deg ayyuren yezrin, maca yeṭṭef-iyi wakud, imi xeddmeɣ yal ass. Ugur-agi n wakud ifelleq-iyi,yerra-yi aman d asawen.
War ma ttuɣ asenfaṛ i sɛiɣ nekk d mmi-s n ɛemmi, isem-is Kusayla. Uriɣ-as imeslayen n tezlatin, akken daɣ i kkiɣ deg uẓawan. Llan sin nniḍen n yimdukkal i icennun yakan xeddmeɣ-asen iḍrisen.
D acu d tamuɣli-ik ɣef tfaskiwin n tmedyezt i d-yettilin yal aseggas ?
Tidet kan, ur lliɣ ara d win i irezzun ɣer tfaskiwin. Deg tama imi yečča-yi wakud, di tayeḍ d udem-nni swayes i d-suddusen tifaskiwin-agi. Akken walaɣ yeqwa deg-sent lfulkluṛ, yerna d lawan ad veddlen talɣa-nni swayes i ten-txeddmen.
Ad ki-d-fkeɣ amedya ɣef temsizelt i d-yetilin di tfaska: ur iwata ara lḥal ad sxelḍen gar imedyazen akkit. Acku aṭas n leṣnaf n tmedyezt i yellan. Akken daɣ i d-yewwi lḥal ad vedden i tesqamut n yinezzurfa, ilaq ad ɛawden tamuɣli i ccɣel-a. Ilaq ad d-awin wid yellan deg taɣult-nni, mačči d menwala ara d yinin asefru-agi yelha, wihin d amenzu neɣ, acku di xilla n tfaskiwin yettilid uxeṣṣar. Imi d-nniɣ akka, mačči d tiyita i d-kkateɣ deg-sen, maca d tamuɣli-w kan i d-fkiɣ. Wamma awid ukan mi llant tfaskiwin d temliliyin.
Sarameɣ tiɣri-agi-inu ad taweḍ at tdukkliwin i d-yelhan d tfaskiwin-agi, s wul zeddigen ara d ɛawden tamuɣli-nsen ɣef temsal-a.
Yerna nekk akken ttwaliɣ, yal amedyaz yuklal arraz, acku imi ttarun s Teqvaylit, mačči s tutlayin nniḍen, uklalen asnemmer d usevɣes. Ad yelhu nezzeh amer tidukkliwin ad suddsent ussan i tezrawin d tenmesla ɣef tmedyezt.
Ad slalen iswiren n tmedyezt, anda ara d temlilin yimedyazen atraren d yiqvuṛen, din ara d myusanen gar-asen, ad mvaddalen timussniwin-nsen. Tamedyezt qvel kulci d taẓuri, mačči d urar neɣ d arraz amenzu.
Amek i tettwaliḍ imal n tmedyezt taqvaylit ?
Tettunefk-iyi tegnit, sneɣ ddeqs n yimedyazen d tmedyazin, s ttawil n yizeḍwa inmettiyen, ladɣa s facebook, deg ukuẓ n tɣemmar n tmurt n Yiqvayliyen. Tugget deg-sen nuɣal d imdukkal. Akked nnuvat i deg i d-ɛeddaɣ deg umaṭṭaf (radyu).
Akken ttwaliɣ tamedyezt Taqvaylit tetteddu akken iwata, tettaẓ ɣer zdat, ɣas ma qwan fell-as wuguren. Llan waṭas deg-sen, gar-asen: Muḥ U Twati, Mebarek Gamar, Qasa Taɛerquvt, Σmiruc Amwanes, Fahima Sediri, Muḥ Karim Ferkan, Malika Lɛerbi, Katya Tewwat, Belqasem Si Qadir, Lilya Seɛdi, Malek Ḥud, Malika Tagawawt, … d waṭas nniḍen, mačči d yiwen neɣ d yiwet ara d-adreɣ, ad yisurfen kan. Rnu ɣer waya llan waṭas i ɣ-yessedhayen s leqdicat-nsen. Zemreɣ ad d-iniɣ belli tamedyezt Taqvaylit d yiwet seg temnza akk deg umaḍal.
Ayen i d-irennun tumert mi ara waliɣ d ayen i di-teffeɣen d ammuden, d iḍevsiyen, d les clips, d tezlatin.
Awal-ik n taggara swayes ara d-nfak tadiwennit-a
Ad ak-iniɣ tanemmirt s tusda ɣef leqdic-ik, sarameɣ-ak tavɣest d ufud deg ayen txedmeḍ. Akken daɣ ara d greɣ tiɣṛi i watmaten d tsetmatin-nneɣ n tmurt Taqvaylit iwakken ad sevɣasen(t) wa d fken(t) afud i yinaẓuren, d yimedyazen-nneɣ. Akken ara sen-ininiɣ ilaq ad ɣṛen(t) ayen i yettwarun s Teqvaylit. Ilaq ad ttaɣen ungalen, tullisin, ammuden, timucuha, iwakken ad yali uswir n Teqvaylit.
Aqlaɣ deg yiwet n tallit, ilaq-aɣ ad nezdi-t iɣallen-nneɣ, ad neddukkelt, ad nemyeɛqal d atmaten, acku Taqvaylit, tesra akk i warraw-is, d nekkni kan ara yesseḥvivren fell-as, ara d tirefden d asawen. Wamma acengu yezga ixneq-as. Tudert i Teqvaylit.
Avruy-agi seg usefru iwemi semmaɣ “A tarwa n Yugurten”, yedda-d deg wammud « Tatut d usmekti », ad yili d tarzeft i yimeɣṛiyen n Vava Innova:
Yuɣal uqelmun s yiḍarren
Ayen iṣeggmen nugi-t
Yekker imerẓi gar watmaten
I yi-tɣaḍeḍ a Taqvaylit
S ṭṭvel i aɣ-zzuzunen
Ay arrac-nneɣ aki-t
A tarwa n Yugurten
Ḥerzet ayla n tjaddit.
Yesteqsa-t Muhubi Akli
