« Tineqqisin n zik » d azwel i yefren mass Muḥand Ameẓyan Uddak i udlis-ines amezwaru i d-yeffɣen deg ussan yezrin ɣer uxxam n teẓrigin Ccix Muḥend Ulḥusin. Adlis-agi s wuṭṭun-is{Son tome} amezwaru yevḍa-t umaru ɣef 20 n yisevtar. Ddant-d deg-s snat n tneqqisin s wunuɣen. Yesqam-d s 150 n yidinaren. D adlis ara d-tafem deg akud i d-iteddun yettnuzu deg tnedlisin n tmurt Taqvaylit. Akka tura a-t-an ɣer umaru di Ccmini.
Mazal ɣer ɣur-s 25 n tneqqisin, ad d-ffɣen-t sya d asawen d uṭṭunen. Ugar aya amaru d win i d-ijemɛen xilla n tmucuha n temnaḍt n At Weɣlis, iḥrez-iten-t, ttrajun-t ass deg ara d-ffɣen-t.
Awal ɣef umeskar
Ilul umeskar deg useggas n 1956, di taddart iwemi ssawalen Taxlijt, i yeṭṭafaren taɣiwant n Ccmini, lɛeṛc n At Weɣlis, deg ugezdu n Vgayet. Mass Muḥand Ameẓyan Uddak, ur as-tettunefk ara tegnit am netta am wiyaḍ iwakken ad yekcem s aɣervaz, ad yelmed, acku ilul-d deg akud n ttraḍ.
Taddart-is deg akud-nni yečča-tt ujajiḥ n tmes, acku yendeh imenɣi nezzeh deg-s. Ɣas akken izgel-it uɣervaz, d acu kan ur yegzim ara asirem, yezga isellmad iman-is s yiman-is, yesmuzgut, mi yewḥel ad yesteqsi. Akka i d-yelmed tutlayt tafṛansist, akked tutlayt-is.
Deg useggas n 1989 yesselmad tutlayt d yidles amaziɣ s yisekkilen Tifinaɣ. Yefka tallelt i waṭas n yiselmaden. Deg useggas n 1998 mi d-tlul tiddukla « Agraw » yessɣaṛay s tlaṭinit. D amezdyaz yessefrawen ɣef waṭas n temsal, yefka 08 n yiḍrisen i talilt{Chorale} n tiddukla Agraw, ffɣent-d d aḍevsi deg useggas n 2019.
Gar iseggasen n 67 ɣer 68, mmi-s n Texlijt, ɣas akken d ameẓyan deg leɛmeṛ, maca yevda yesteqsay deg iman-is, yeqqar deg ul-is : « Amek akka tura, Tafransist tettaru, Taɛrabt tettaru, Taqvaylit ulac. » Ass-a yessaweḍ ɣer yiswi-ines, yura s Teqvaylit, yessuffeɣ-d adlis s Teqvaylit. Akken yeqqar yinzi: « D acu tettnadiḍ ay aderɣal. D tafat. »
