Awal ɣef Ḥusin Luni d ukkuz (4) n yedlisen i d-yessaẓreg

,

Ḥusin Luni, d mmi-s n taddart n At Ʃṭella, i yettafaren taγiwant n At Yeḥya Musa, lɛeṛc n Yiflisen Umellil. Ilul-d deg ass n 11 furar n useggas 1983.

Ḥusin yevda amecwar-is di tsekla s tmedyezt, d aya i t-yewwin ad yekki deg xilla n tfaskiwin d temliliyin i d-yettilin di temnaḍin yemgaraden di tmurt, am: At Ziki, Ayt Smaɛel, Aqvu d waṭas n tamiwin-nniḍen. Yewwi nnig n semmus n warrazen deg twessit-agi.

Ilemẓi n Yiflissen Umellil, ur yeqqim ara kan deg isefra, yettaru ula d tullisin. Deg useggas n 2013, mi d-tessuddes tesveddit takanidit Tiregwa tazṛigt-ines tamezwarut n warraz n tullisin Belɛid At Ʃli, ameskar (Auteur) yekki s tullist am netta am wiyaḍ. Yefka-as azwel “Tareccact” syes i d-yewwi arraz amenzu.

Seg tullisin, yezger ɣer uḥric n tsuqilt. Yerra-d aṭas n yiḍrisen d tullisin ɣer teqvaylit. Yessuqel-d ula d adlis-nni n “Le Prophète” i yettwasnen deg umaḍal n Ǧebran Xalil Ǧebran. Yefka-as azwel “Nnbi”.

Akken daɣ i yefka azal i tira n wungalen. Ar tura yessaẓreg-d sin. Deg useggas n 2018, yewwi arraz “Racid Σellic” n wungal ifazen. Arraz-agi d Tasveddit Takanadit Tiregwa i t-id-yeslullen, iwakken ad tefk tavɣest i yimyura n teqvaylit.

I usmekti, ungal Asebbaɣ, yeffeɣ-d di teẓrigt-ines tis snat ɣer uxxam n teẓrigin Imru i yella di Tizi Wezzu. Deg useggas asdawan 2018-2019, tanelmadt Ḥayat Wehrani seg ugezdu n tutlayt d yidles Amaziɣ n tesdawit Ɛebdeṛṛeḥman Umira, n Vgayet, tessuli tazrawt-inens n Master, s uzwel: “Tasleḍt n tsiwelt deg wungal Asebbaɣ n Ḥusin Luni”

Ugar aya, Lḥusin iga aṭas n yisaragen d temliliyin d wid t-iḥemmlen, yewwi-asen-d ɣef yidlisen-is, d leqdicat-is. Yella seg wid i d-yeslulen “Amedyez”. Akken daɣ i d-yessuddes aṭas n leqdicat idelsanen d wid n tsekla.

Idlisen i d-yessaẓreg

Tfuk ur tfuk ara, ungal, 2013.
Nnbi, tasuqilt ‘’Le Prophète’’ n Ğebran Xalil Ğebran γer Teqvaylit, 2014.
Seddaw n treccact, ammud n tullisin, 2015.
Asebbaγ, ungal, 2017.

Hocine Louni