Smaɛil Yefṣeḥ, ilul deg ass n 29 n wayyur n tuver, aseggas 1962, di taddart Tala Ɛmaṛa, i yeṭṭafaren taɣiwant n Tizi Raced, agezdu n Tizi Wezzu, di tmurt Taqvaylit.
D win i d-yewwin agerdas n licence deg tussniwin tisertanin deg uḥric n wassaɣen igraɣlanen. Syin d afella iqeddec d aneɣmas deg tiliẓri tazzayrit. Ɣas akken ixeddem ɣer ucengu n timmuzɣa, maca yessen d acu d azal n tɣamsa, d wacu yeswa uneɣmas, ṛṛay-is ixeddem-it, tiktiwin-is yesɛeddayiten-t ɣas ma yella ttgallan deg-s.
Mmi-s n Tala Ɛmaṛa, yettwassen daɣen s umecwaṛ-is n timmeɣnest, deg ayen yerzan izerfan, d tnekkit d yidles Amaziɣ. D aya i t-yeǧǧan ad yili ɣer tama n waṭas n yimeɣnasen d yimḍebbren n umussu adelsan MCB.
Deg unvir n useggas 1988, yecqirrew adavu azzayri, imi d-yesɛedda yiwen n urupurtaj s tutlayt taqvaylit. Mačči yenna-d ula d awal s taɛravt neɣ s tutlayt-nniḍen. D ayen i d-yernan tavɣest d usirem i yimeɣnasen di tallit-nni.
Yettwanɣa zdat n uxxam-is di Bab Zzwaṛ, deg ass n 18 di tuver n useggas 1993. Ɛussen-t kra n yimdanen i yettwaselḥen mi d-yeffeɣ tanzayt n wass seg uxxam-is, ad yawi avrid s axeddim, wwten-t s ujenwi, zedgedgen-t akk, syin kemmlen-as s teldunin (Balles).
