« Leɛceq-im yefḍeḥ » d azwel n tezlit tamaynut n ucennay aqvayli Karim Si Ɛemmur. Yerra-tti-d ɣer tiliẓri-ines tunṣivt n yutub, ass-nni n 15 tuver yezrin.
Yessekles-itt ɣer ustudyu Imdukal, akked Z-Pro. Aḍris d uẓawan n leklip-agi d anaẓur Karim i ten-ixedmen, ma d aseḍru (Réalisation) yella-d s lmendad n mas Mulud Zidan.
Kkin deg usufeɣ n leqdic-agi, Yuva Uld Daḥmed, Zubir Buɛliya, Murad Buǧennaḥ, akked Cahrazad. Di taggara n uklip acennay Karim Si Ɛemmur, yesnemmer mas Charles Hubert Dupont akked mas Kamal Kulali.
Leɛceq-im yefḍeḥ, d tizlit i yexdem unaẓur ilemẓi ɣef tayri d wuguren s wayes i d-tgellu neɣ ɣef uɣurru i d-yettilin gar sin yeddakalen ɣer taggara ad ti-tteɣdeṛ tin akken i iḥemmel. Yecna-tti-d s taɣect-is ḥlawen, yessergagayen ulawen. Deg uzwel-ines (Titre) aṭas ara d yefhem umdan.
Aklip-agi d win yemmuggen di Lpari, di tmurt n Fṛansa, uraren-d deg-s: Karim Si Ɛemmur, tilemẓit Cahrazad akked yilemẓi Murad.
Anwa id Karim Si Ɛemmur ?
Ilul deg at Dwala, di temnaḍt n At Ɛisi, agezdu n Tizi Wezzu, di tmurt Taqvaylit, d acennay d ameskar (Auteur). D win i d-yekkren s tezlatin n yicennayen n temnaḍt-is, am: Ccix Lḥesnawi, Meɛtub Lwennas, Crif Ḥamani, Zedek Mulud,… d wiyaḍ.
Deg tazwara n useggas n 2019, yessuffeɣ-d aḍevbsi-ines amezwaru ɣer teẓrigin Axalaf i yella deg iɣrem n Tizi Wezzu. D aḍevsi deg i d-ddan-t 07 n tezlatin, s yizwal-nsen-t: Ruḥ a tayri. Mi tedda d tislit. Tawaɣit n Uqvayli. Nekk yid-m. Limer ad yi-d-tsaḥeḍ. Tasekkurt teḥzen (d tajmilt i Sliman Σazem). Akked yiwet Instrumental.
Ilemẓi n At Dwala i yettidiren di iseggasen aya di Lpari, icennu ɣef xilla n yisental, am tmetti, tayri, tasertit, temẓi d wayen nniḍen. Akken daɣ i yexdem xilla n tmeɣriwin ama di tmurt neɣ deg inig.
