S yisem-is n tedvelt Ḥamid Ceṛyet, ilul-d di taddart n At Lḥasen i yeṭṭafaren lεerc n At Yenni. D anaẓur i yessuffeɣen tizilit Taqvaylit i tlisa n tmurt-is, tekka-d amaḍal. Di tevdelt tarumit {administration française} yessekri dakken ilul deg ass n 25 di tuber n useggas 1945. Maca anaẓur Mennad netta yessefhem-d dagi dakken deg useggas n 1947 i ilul.
Yeɣra tasnakalt {Géologie}, maca yufa-d iman-is deg umaṭṭaf wis sin icennu, ur yevni ara fell-as. Di tazwara iɣil ad yexdem di kra n tkebbanit n lpiṭrul, di tniri {Désert}.
Deg useggas n 1973 i yebvda amecwar-is s wudem unṣiv, yufrar-d s tezlit « a vava inu va », d amedyaz n teqvaylit Ben Muḥemmed i yuran asefru, i d-yewgem seg tgemmi taqvaylit taqvuṛt.
Deg useggas n 1975, yewwi avrid n yinig, yers di Lpari, din tessawel-as-d tkebbanit Pathé Marconi iwakken ad yexdem yid-sen. Aseggas d afella yessuffeɣ tasfift s uzwel « Vava inu va », ddant-d deg-s tezlatin nniḍen iyettwasnen, am : Ssendu, Cfiɣ, Azwaw, Zwitt rwitt, … d tiyaḍ.
Deg useggas n 1979, yuɣal-d s tesfift-nniḍen, yefka-as azwel « Ay arrac nneɣ ». Gar tezlatin i d-yeddan deg-s: Awah awah Muḥend-nneɣ d afeḥli, Amnafeq, Acawi, lmut, … d tiyaḍ.
Deg inig, yeslul-d netta d kra n yimeddukal-is tiẓrigin n ccna, semman-as Azwaw, i yefkan tallelt i waṭas n yinaẓuren Iqvayliyen di tallit-nni. Akken daɣ i yekki deg tervaɛt n ccna taqvaylit Agraw i yettwasnen nezzeh deg useggasen-nni n 80.
Deg tefsut n 80, mi tendeh tnekra di tmurt taqvaylit, adavu azzayri yettawi imeɣnasen ɣer leḥvas, Yidir ur yessusem ara, yecna tizlit Ay izumal, yerra-asen tajmilt, mi d-nnan tiquṛanin. Tettunefk-as tegnit iɛedda-d di kra n tiliẓriwin, imeslay-d fell-asen, d tedynin yeḍran.
Yeqdec d waṭas n yinaẓuren iqvayliyen, gar-asen: Agraw Buǧemɛa, Brahim Izri, Takfarinas, Lwennas Meɛtub, Ferḥat Mhenni, Nwaṛa, Crif Xeddam, Lewnis Ayt Mengellat, Akli.D, Muḥemmed Ɛellawa, d wiyaḍ. Yerna yefka tallelt i yicennayen ilmeẓyen, ama s wawal yelhan neɣ s leqdic.
Allalen i yesseqdac nezzeh di ccna-is, d tagambart, derbuka d tjewwaqt. D wigi i iḥemmel ugar. Dɣa tajewwaqt d allal-ines amezwaru s wayes yelmed aẓawan, seg temẓi-is tezga yid-s, yettimɣur, tettimɣur ɣer yidis-ines.
Mmi-s n At Yenni, i d-yefkan acḥal d itri, iɛedda-d deg aṭas n tiliẓriwin i yettwasnen deg umaḍal, am France 2, TF1, M6, France 24, TV5 Monde. Yecna deg tzeɣwa timeqqranin, ur yeǧǧi ara tiɣmert deg umaḍal, yecna di L’Olympia, Zénith, d tiyaḍ. Yekka-d Turuft, Marikan, Kanada, Merruk, Taferka n wadda, d tmura nniḍen.
Anaẓur Yidir yeǧǧa amaḍal, yessuffeɣ iman di sbiṭar n Bichat di Lpari, deg ass n 02 di mayu n useggas-agi n 2020, ɣef tudert n 70 n yiseggasen. Yettwamḍel deg inig, yerna ɣer Ɛellawa Zerruqi, Sliman Ɛazem, Ccix Lḥesnawi, Faṭma n At Menṣur, Aɛrab Buyezgaren, Reḥmani Ɛebdelqader, Malek Wari, d Ṭawes Iɛemṛucen, d wiyaḍ. Yettwamḍel di tallit-nni n ukman, di tjebbant n Père-Lachaise, deg ass n 13 mayu.
Gar iḍevsiyen d tesfifin i d-yessaẓreg:
- 1976 : A Vava Inu va
- 1979 : Ay arrac nneɣ
- 1993 : Les Chasseurs de lumière
- 1999 : Identités
- 2002 : Deux rives, un rêve
- 2005 : Entre scènes et terre
- 2013 : Adrar inu
- 2017 : Ici et ailleurs
