Tella tettraju tuffɣa-ines s ccuq, d lḥir. Di tazwara tefka-t i uxxam n teẓrigin Tira i yellan di Vgayet, ddaw uzwel Ccfawat n teqcict. Maca vav n teẓrigin-agi am akken ur d yecliɛ ara, yerna yewwet nneḥ, yeqqim wammud ɣer ɣur-s nnig n sin n yiseggasen. Mi testeqsa Kaysa amek, yeqqar-as-d sveṛ kan. Maca akken yeqqaṛ yinzi-nni n Teqvaylit: « Ssveṛ yesɛa tilisa ».
Syin akin Kaysa tules azwel i wammud-ines, yeqqel seg Ccfawat n teqcict ɣer Tabrat. Akken daɣ i tveddel kra n tullisin s tiyaḍ. Send tamettant-ines s kra wakud tefka-t i umedyaz-amsiẓreg Mebarek Gamar, i yellan yakan yeslul-d tiẓrigin s yisem n Ccix Muḥend Ulḥusin. Ɣas akken mas Gamar yeqvel ad as-ti-d-yessuffeɣ, maca tezwar-d lmut ɣer Kaysa, ammud-is ur as-teḥḍir ara.
Ammud Tabrat yeffeɣ-d deg tagara n wayyur n ɣuct n useggas 2018, yevḍa ɣef 116 n yisevtar. Ddant-d deg-s 07 n tullisin yemgaraden. Tal tullist s tedyant-is. Yettnuzu deg tnedlisin n tmurt Taqvaylit s ssuma n 250 n yidinaren.
Ammud-agi tvudd-it Kaysa i yimeɣriyen n tutlayt Taqvaylit anda ma llan, syin terna-d twacult-is akken ma tella, d wid i t-iḥemmlen, i t-yessevɣasen.
Agzul seg tmeddurt n Kaysa
D illi-s n taddart n Ayt Tɛissewt, i yeṭṭafaren taɣiwant n Ayt Smaɛel. Tlul deg ass n 14 yunyu n useggas 1991. D tamedyazt, d tamarut, teqdec ula deg tɣamsa ɣas ma yella ur teɣri ara di taɣult-agi. D Taqvaylit-is i d-yessawlen, nettat terra-d i tiɣri-s.
Tura ddeqs n yimagraden deg Tiɣremt akked Aɣmis n Imaziɣen. Tezga tettawi-d ɣef yidles d tẓuri, texdem tidiwenniyin i yimeɣnasen, imyura d yinaẓuren, tettaru ula ɣef yimeɛḍar, d wuguren n tmetti n yal ass. Tekki deg usenfar n tsuqilt n uzeṭṭa Arusi VK ɣer tama n Muḥend Uvelqasem d yimeddukal-is, ɣer tutlayt Taqvaylit.
Ugar aya Kaysa, tekki deg uslal n tiddukla n tlawin AMZUR deg Ayt Smaɛel. Ungal-ines Iḥulfan, yewwi arraz n tewtemt (Féminine) Yamina Mcakra, seld (Après) tamettant-is. Rnu ɣer waya uɣalent-as aṭas n tejmilin ama di tmurt Taqvaylit, Fransa, akked Kanada.
I usmekti, Kaysa d uletma-s n umaru-amedyaz Mhenni, akked d yilemẓi acennay Meẓyan, d Ṣafiya i d-yessuffeɣen tamacahut s wunuɣen. D tawacult n tẓuri d yidles.
Teqdec almi d ass-nni deg acu i d-testeqa ɣur-s lmut, tewwi-tt akken d tilemẓit ɣef tudert n 27 n yiseggasen. Kaysa Xalifi teǧǧa amaḍal tameddit n wass n 25 yunyu 2018. Tettwamḍel di tjebbant n taddart-is.
Idlisen n Kaysa :
Kem deg-i, ammud n tmedyezt, 2016
Iḥulfan, ungal, 2017
Tabrat, ammud n tullisin, 2018
