Tilla, d azwel n wammud amezwaru, n umedyaz aqvayli, mas Ɛebdelkrim Ṭehṛawi, i yettwasnen s yisem n Karim Yeɛlawi. Ammud-agi yeffeɣ-d deg ass n 25 yunyu n useggas n 2019, ɣer teẓrigin Ccix Muḥend Ulḥusin. D adlis i yevḍa umedyaz ɣef 68 n yisevtar, ddan-d deg-s 33 n yisefra. Yal asefru ɣef wacu tadyant i d-yewwi.
Iga-as tazwert umedyaz-amsiẓreg Mebarek Gamar. Ammud Tilla d win ara d-tafem akk di tnedlisin n tmurt n Yiqvayliyen. Yettnuzu s ssuma n 200 n yidinaren.
Agzul ɣef tudert n umedyaz
Ilul mas Ɛebdelkrim Ṭehrawi, deg ass n 13 yulyu n useggas n 1958. D mmi-s n temnaḍt n Genzat, deg At Yeɛla. Yekker-d d agujil, acku baba-s yemmut mi d-ilul s kra n wagguren. Yegra-d netta d yemma-s d wayetma-s.
Mi yesɛa semmus n yiseggasen, skecmen-t ɣer temɛemmeṛt, di temnaḍt n ccriɛa. Maca deg useggas n 1968, ɣas akken isemmed 10 n yiseggasen deg tudert-is, tettunefk-as tegnit yekcem am netta am warrac n tallit-nni ɣer uɣervaz n temnaḍt-is. Syin ikemmel almad di Vgayet.
D acu kan mmi-s n Genzat ur iɛeṭṭel ara yettaxer-d si lakul. Yexdem tannant{Stage} i teɣzi n sin n yiseggasen d uzgen deg ayen yerzan asnulfu d nneqc ɣef usɣar.
D win yevdan tamedyezt d umennuɣ deg useggas n 1973. D netta i yellan deffir n tmesvanit i d-yeḍran deg At Yeɛla, mi tendeh tefsut n 1980, deg tmurt n Yiqvayliyen, asmi yugi udavu ad yeǧǧ amussnaw Mulud Mɛemmeri ad yeg asarag ɣef yisefra iqvuṛen n Leqvayel di tesdawit n Tizi Wezzu.
Amedyaz n At Yeɛla, d win yessefrawen ɣef tnekkit d yizerfan, Taqvaylit d yiẓuran, timetti d yiɣevlan, tayri d yiḥulfan, akken daɣ i yerra tijmilin i wid yeẓra uklalen, neɣ wid ɣef tmagit ɣlin.
Mas Ṭehrawi, yekki deg waṭas n tfaskiwin n tmedyezt i d-yettili sya ɣer da di tmurt n Yiqvayliyen, akken daɣ i yexdem kra n temliliyin s usnaz s uvuddu {Vente dédicace} i wammud-ines.
Yeqqar-as deg yiwen n usefru, iwemi yefka azwel « Tagelda n yifis« :
Ḍḥiɣ-d d yiwen deg-sen
Mlulɣeɣ gar-asen
Di tleɣlal yemṛarreɣ yifis
D asgen zedɣen yilfan
Ur ttfakkan
Tezdeg ur ivan later-is
