S yisem-is n tedvelt Ɛebdelqader Meksa, ilul deg ass n 04 di yunyu aseggas 1954, di taddart n Mira, i yeṭṭafaren tamnaḍt n Tmizar n At Jennad. Yekcem deg unnar n ccna n Teqvaylit deg iseggasen-nni n 1970, s uɣaniv-ines atrar. Deg useggas n 1975 yessuffeɣ-d sin n yiḍevsiyen, amenzu d « Lunǧa », wis sin d « Tafsut ».
Ass n 31 di yulyu n useggas 1976, yecna deg yiwen n uvaraz (Concert) ɣer tama n snat n tgejdiyin n tẓuri d ccna n yifrasisen, wigi Léo Ferré akked Gilbert Lerroux. Akken daɣ i yexdem yiwet n tmeɣra di tzeqqa n Aṭlas, deg useggas n 1979.
Deg ayyur n tuver n useggas n 1976 yewwi avrid n yinig ɣer Lpari, am netta am yinaẓuren n tallit-nni, ttṛuḥun ttuɣalen. Aḍar di tmurt n Yiqvayliyen, wayeḍ di Fṛansa.
Din i yemlal, yemyusan d yiwet n tlemẓit ssawalen-as « Nathalie », d tamẓawant (Musicienne). Ur ɛeṭlen ara myezwaǧen, zedɣen deg Épinay-sur-Seine, i yeṭṭafaren Saint-Denis. Deg useggas n 1979 sɛan-d aqcic, semman-as « Darius », maca ur yeddir ara aṭas, yemmut akken d llufan. Deg useggas 1980 n tlul-d ɣur-sen teqcict, fkan-as isem « Masiva ».
Meksa ɣas ma d acennay, maca d win i d-yettalsen amezruy d wansayen n Yiqvayliyen d win n Yinumidiyen di tezlatin-ines, am: Massinisa, Lunǧa, Timecreḍt, Anẓar, Tafsut, d tiyaḍ. Yerna-d afud d ameqqran i teztlit tatrart Taqvaylit, ikcem gar yizwura, yerna-d afud i wid i t-yezwaren, am: Yidir, Feṛḥat Mhenni, Ǧamal Ɛellam, Les Abranis, Nurdin Cennud, Inaṣliyen, Tagrawla, Brahim Izri, d wiyaḍ yal wa s wazal-is.
Mmi-s n At Jennad, yecna deg waṭas n tzeɣwa deg yinig, yeqdec d xilla n yinaẓuren Iqvayliyen d yiveṛṛaniyen. D Muḥ Cerbi i s-yettaken iḍrisen, netta ixeddem-asen aẓawan. Akken daɣ i yecna kra n yiḍrisen n Ccix Nuṛdin.
Meksa yettwanɣa deg ass n 30 di tuveṛ n useggas 1988 ɣef tudert n 34 n yiseggasen. Tamsalt-is ar tura teffer, mazal ur t-van ara tidet iwatan ɣef lmut-is. Yettwamḍel di taddart anida i d-ldin-t wallen-is, gar yimawlan-is.
Deg useggas n 1999, tlul-d yiwet n tiddukla tadelsant di taddart-is « Mira » tewwi isem-is . Ɣas zrin 32 n yiseggasen ɣef lmut-is, maca mazal Iqvayliyen ttmektayen-ti-d, ttaran-as tijmilin, ttalsen i tezlatin-is.
Iḍevsiyen d tesfifin i d-yessuffeɣ :
Lunǧa (45 tours), 1975
Tafsut (33 tours). 1975
Tafunast Igujilen, 1979
Amnekcem, 1980
Tiqvayliyin, 1982
Amɣar azemni, 1988
