Kamal Amzal, i wumi ssawalen Maǧid At Weɛmeṛ, ilul deg ass n 13 deg wayyur n tuver n useggas 1962, di taddart n Tiferḍuḍ, i yeṭṭafaren taɣiwant n At Vu Yusef, di temnaḍt n Micli.
Deg useggas n 1968 yekcem ɣer uɣerbaz amenzu, i yellan di taddart-is. Syin deg useggas 1974 yekcem ɣer uɣerbaz alemmas n Ɛmeṛ n At Ccix, di Ɛin Lḥemmam, ma deg useggas n 1978 yekcem ɣer tesnawit n Mesṭafa Ben Bulɛid. Yewwi-d akayaḍ-ines n bakaluṛya deg useggas n 1981. Syin yefren tasdawit n Ben Ɛeknun, din i yeḍfer aḥric n tsuqilt s tutlayt Taspenyulit.
Mi tetterḍeq tefsut n 1980, Kamal yella d anelmad di tesnawit, imir-nni yesɛa 18 n yiseggasen di tudert-is. Din i d-ivan s timeɣnest-is, yettnaḍaḥ ɣef tnekkit d tugdut, akken d ilemẓi, yella gar yimeɣnasen i yettnaγen γef usenṣev n tutlayt tayemmat akked tugdut, ur yeffir ara, yeqdec tazmert-is, ɣas ma yella adavu d win i d-yesseɣlin lḥeṛs d tugdi deg uzal qayli.
Deg useggas n 1981, Kamal yewwid agerdas n BAC, yekcem ɣer tesdawit n Ben Ɛeknun, yevda aheyyi deg turagt n tsuqilt s tutlayt taspenyulit, yerna din i yessen imeɣnasen i yettnaḍaḥen γef tugdut d tnekkit, gar-asen Mestafa Baca, d wiyaḍ.
Timenɣiwt-is
Yettwanγa γef tudert n 20 yiseggasen, s umger deg teγremt tasdawant n Ben Σeknun, di tmurt n Lezzayer, deg ass n 02 unvir n useggas 1982. Send ad tenγen yicenga n tudert, uznen-as yiwet n tevrat, anda iy-as nnan ad tḥevseḍ leqdic-ik neγ ad temteḍ. Ass-nni at iččumar nɣan Kamal, rnan wwten 15 seg yimeddukal-is isdawanen, jerḥen-ten s lemwas.
Nγant i mi yekfa assenṭeḍ n yiwen n wulγu γef lḥiḍ, anda i yessawal γer yiwen n ugraw n yisdawanen, i wakken ad slalen yiwet n tesqamut tasdawant ara yesselḥayen lecγal n tesdawit.
Tawaγit teḍra-d, ilemẓi iruḥen deg usirem ad yekfu leqraya-s, teffeγ-as tirga mxalfa, cleqfent yinegmaren n tmusni. Ma d adavu amharsan am leɛwayed-is yefka afus deg temsalt-a, imi d aqvayli amagday i yettwanγan ur d yecqi ara. 04 n yiseggasen d afen win i yenɣan Kamal Amzal, iwemi ssawalen Lassuli Fateḥ-Ellah yeffeɣ-d d ilelli, s leɛfu n Cadli Benjdid aselway n Lezzayer.
Kamal Amzal, yura yisem-is s yisekkilen n wureγ deg umezruy n tmetti Taqvaylit, yal aseggas tettuγal-as tejmilt. Llan daγen yinaẓuren i yecnan fell-as gar-asen acennay amḥaddi n tezlit Taqvaylit Uleḥlu, akked Maǧid Sula akken daγ i d-tlul yiwet n tiddukla tadelsant di taddart-is, tewwi isem-is.
Anavaḍ Aqvayli Uɛḍil si tama-s yerra ass n 02 deg unvir, d ass aγelnaw n unelmad Aqvayli, s tegzemt (Par decret) n° GZM/2010/18/ASAN/10, i d-yellan deg ass n 26 di tuver n useggas n 2010. Aya-gi d tajmilt i umeɣras n tugdut d tnekkit yettwnaɣan s ufus n wat iččumar d yisuɣan n llah wakbar. Akken daɣ ara d yeqqim d asmekti i tsutiwin ara d-yasen.
