Ddaw n leɛnaya n snat n tiddukliwin tidelsanin « Imnar » akked « Asurrif », ara d tili teẓrigt tis ukuẓ n udlis i warrac. Asihar d win ara d yilin deg uɣervaz amenzu n umeɣras « Ḥellu Muḥmed Ameẓyan », n taddart Agni n Ufeqqus, taɣiwant n Buǧima s yiwen n wahil d ameṛkanti, i yevḍan ɣef sin n wussan, 06 d 07 deg ayyur-a n wunvir. Taẓrigt n useggas-a fkan-as azwel: « Ad ɣreɣ akken ad imɣureɣ »
Yetturaǧu deg teẓrigt-agi tikkin n waṭas n yixxamen n teẓrigin, gar-asen-t: Ccihab, La Pansé, Richa Elsam, d tiyaḍ. Ma d imyura ad yili gar-asen : mas Karim Ceryef, amedyaz Ḥsen Merric, akked umeskar n tesfifin n wunuɣen mas Kamal Bentaha.
Timlilit d tin ara yevdun deg wass n 06 deg wunvir, aɣervaz n Ugni n Ufeqqus ad yeldi tiwwura-is ssveḥ zik. Iwakken ad imager inevgawen-is d wid ara yekkin deg leqdicat-agi. Ahil ad tili deg-s: temzikent, asnaz s uvuddu n yidlisen, tinemsal i tineɣt (Atelier de dessin), leqdicat i warrac imecṭaḥ, isaragen, d wayen nniḍen.
I was n 07, ad yili ciṭ n umgired ɣef wahil n was amenzu, imi d ameskar n tesfifin n wunuɣen mas Kamal Bentaha ara d-yilin d inebgi n yiseɣ. Syin ad ilin-t tmensal: n tmucuhan, tineɣt, tira, akked tmucuha.
Mi kfan, d talilt (Troupe) n tiddukla Imnar ara d yecnun yiwet n tezlit n Yidir. Akken daɣ ara d tili yiwet n tceqquft n umezgun i yigerdan s uzwel « Tamacahut n tsekkurt ». Syin d asarag n mas Kamal Bentaha.
Iswan igejdanen n tiddukliwin Imnar akked Asurrif s leqdic-a amesvaɣur, deg yiwet ran ad fken tallelt d tevɣest i yimyura d yimeskaren n twessit-a. Di tayeḍ vɣan ad ẓẓun tikti n tɣuri n yidlisen deg allaɣen n yigerdan, iwakken ad tgemmu yid-sen, ad sen-teqqel d tanummi. Yenna unaẓur deg awal-is: Win i teddun ɣef tidet yessawaḍ.
