Asḥissef d usebɣes, d azwel n wammud amezwaru n tmedyezt i yefren umnadi, amedyaz, mass Ǧamal Meḥrug. Ammud-agi yeffeɣ-d ɣer uxxam n teẓrigin Imel, di Tizi Wezzu, deg wayyur n fuṛaṛ n useggas-agi n 2020.
D ammud i yevḍa umedyaz ɣef 133 n yisevtar, ddan-d deg-s 60 n yisefra, s yiɣaniven-nsen yemgaraden, yal yiwen d acu-tt tedyant-is. Di tallit-agi yettnuzu deg kra n tnedlisin n Tizi Wezzu. Tazwert tella-d s lmendad n mass Ǧamal. D adlis i yettnuzun s 350 n yidinaren.
Ammud-agi yevḍa-t umedyaz ɣef sin n yiḥricen. Aḥric amezwaru ad d-tafem deg-s isental i icudden ɣer tmetti, tudert d wansayen. Ma d aḥric wis sin, d isental i icudden ɣer tmagit; amennuɣ; tasertit d tejmilin.
Agzul ɣef tudert n umedyaz :
D mmi-s n temnaḍt n At Wasif, ilul deg taddart Agni Ferru, i yeṭṭafaren taɣiwant n At Tudert. Seg mi yella d amecṭuḥ i iḥemmel tamedyezt d tira. Mi yekcem ɣer tesnawit i yebda yettaru isefra, maca di tallit-nni ur as-tettunefk ara tegnit ad d-yessuffeɣ tamedyezt-ines d adlis.
Gar yimedyazen d yinaẓuṛen iqbayliyen i iḥemmel yilemẓi n At Wasit s waṭas, yella: Si Muḥend Umḥend; Muḥya; Ḥmed Leḥlu; S.Bya; Meεtub Lwennas; Sliman Ɛazem; Feṛḥat Mhenni; Zeddak Lmulud, Ɛmiṛuc Amwanes. Ma d iveṛṛaniyen yettak tameẓẓuɣt i: Baudelaire; Rimbaud; Jean Jacques Goldman… d wiyaḍ.
Deg useggas n 2007 yekcem ɣer tesdawit Mulud Mɛemmeri, di Tizi Wezzu, yeḍfer tutlayt d yidles Amaziɣ. Deg useggas n 2011 i d-yeffeɣ syin s turagt deg uḥric-agi.
Seg akken yefka azal, yerna i iḥemmel tira, yewwi avrid ɣer Lezzayer, din i d-yesɛedda aseggas deg uɣervaz unnig n tɣamsa. Deg useggas n 2014 yeqqel-d alarmi d tasdawit n Dda Lmulud, iwakken ad ikemmel aḥric n master deg ayen yerzan tiẓuriwin d tsekliwin. Deg 2016 yewwi-d agerdas-ines n master, akka tura a-t-an deg useggas-ines wis sin n duktuṛa deg taɣult n tsekla.
Deg tallit-agi deg i nella amedyaz-amnadi Ǧamal Meḥrug yettheggi ammud wis sin n tmedyezt s tutlayt n Teqbaylit. Rnu ɣer waya d win yettikin deg leqdicat idelsanen, yettili deg yisaragen d temliliyin-nniḍen n tsekla.
