Yeffeɣ-d s wudem unṣib, udlis amezwaru n yilemẓi Werdi Lyazid. D ammud n yiḍrisen i d-yeffɣen ɣer uxxam n teẓrigin Imru, i yellan deg yiɣrem n Tizi Wezzu. Yefka-as umeskar azwel « Abruy si tsekla tagraɣlant ».
D adlis i yebḍa umeskar ɣef 128 n yisebtar. Ddan-d deg-s 41 n yiḍrisen yemgaraden, akked 10 n yisefra, yal asefru s tedyant-is. Tazwert n udlis-agi tella-d s lmendad n umsenselkam{Informaticien} Muḥend Ubelqasem. Akken daɣ i d-trra tura-d deg-s tmsekart Dallila Qeddac Ccix, mas Geni Remḍan, akked mas Werdi Akli.
Ammud-agi n yiḍrisen d win yettnuzun s ssuma n 500 n yidinaren, akka tura yella di kra n tnedlisin di Tizi Wezzu, si leɛḍil ad yettwazuzzer deg tamiwin nniḍen n tmurt n Yiqbayliyen.
Agzul ɣef tudert n umeskar
S yisem-is Aqbayli « Lyazid n Yirubaḥ », ilul deg wass n 16 deg wayyur n duǧember n useggas 1983, di Larebɛa n At Yiraten. D mmi-s n taddart tanewwart i d-yezgan di tɣiwant n Wayt Umalu. Deg useggas n 2007 i d-yewwi turagt deg uḥric n tutlayt d yidles Amaziɣ, si tesdawit n Mulud Mɛemmeri, di Tizi Wezzu.
Seg useggas n 2010 ar ass-a iqeddec d aselmad n tutlayt Taqbaylit deg uɣerbaz alemmas n yimeɣrasen « Atmaten Lewhi » i yellan deg Wat Umalu. Deg uɣerbaz-agi i yelmed ula d netta, asmi d-yezger seg uuswir amezwaru ɣer ulemmas.
Mmi-s n Larebɛa n At Yiraten, iḥemmel nezzeh tutlayt-is, yefka-as azal d ameqqran, d aya i s-d-yeldin abrid d wallen ɣer tira. Yerra-d xilla n yiḍrisen seg tutlayin tibeṛṛaniyin ɣer tutlayt Taqbaylit, ladɣa seg teglizit d tefṛansist. Tikwal akka yesrusu-d kra seg-sen deg uzeṭṭa n facebook.
Ameskar n wammud « Abruy si tsekla tagraɣlant » yettaru imagraden deg tesɣunt « Aselmad », akken daɣ i yekki deg umussu asduklan. Yella d aɛeggal deg waṭas n tiddukliwin, gar-asent: Tiddukla « Igawawen », i yellan di Larebɛa n At Yiraten, tiddukla tadelsant n taddart-is « Tafrara », tiddukla n yiselmaden n Tmaziɣt.
Ugar aya aselmad-a ameskar, d win yettaken tallelt d ufud i temsizzlin n tutlayt d yidles Amaziɣ, ama d arraz Bulifa, neɣ arraz Mulud Mɛemmeri. Yettili deg ttiɛadat d temliliyin tidelsanen, yettṛuḥu ɣer yisaragen, yerna yetta-k afus n tallelt i yinelmaden d kra n wid t-iqesden.
