Dayen yessefraḥen aṭas mi ara nettwali icennayen-nneɣ yesεan isem, cennun d ilmeẓyen d-yettnekkaren ass-a, yal wa ad tasuta ad tt-ttak asafu yuɣen i tayeḍ akken ur ixetti-ara. Ayen nwala di tezlit-agi ur yeṭṭuqet ara s waṭas di ccna n teqbaylit, ur nettwali ara icennayen imeqranen cennun d ilmeẓyen.
Kedym yuɣal-d s tezlit tamaynut : »yella usirem ». D tizlit yecna akked ucennay ameqran Zedak Mulud. D tizlit d-yettmeslayen ɣef yir liḥala n tmurt n Leqbayel akked d wansayen-is yettruḥun. Tizlit truḥ am wakken d adiwanni gar yilemẓi n wass-a yuysen taqbaylit akked umusnaw yeččuren d asirem, i as-ittekksen aɣbel.
L’Klip d-yeffeɣ ass-a di snesla n Yutube n Kedym deg-s ad nḥulfu d utqelleq n Kedym ɣef wansayen yettruḥun akked tutlayt yettaǧan ilsawen, d teswiεt i beddlen sumata di tmurt. Si tama niḍen amusnaw, Zedak, yekkes-as aɣbel, yettarra-yas-d asirem. Ar tagara n tezlit yenna-yas : »skud tell-am, mazal asirem ».
Akka id leqdic deg dduklen ifassen, yal yiwen yewwi-d adɣaɣ-is ar lebni n tezlit, yal tasuta tettikki deg-s : ilmeẓyen n wass-a, ilemmusa akked imezwura n yiḍelli. D amedya n tegmat i tuḥwaǧ teqbaylit akked yidles. Ad d-naf ar ccna d Kedym s taɣect-is ḥlawen akked ucennay-nneɣ ameqran ZEDEK Mulud, ar useggem n uẓawan d gma-s Koosyl, ula d netta d acennay s tefransist, imeslayen n tezlit n umedyaz Fahim MESƐUDEN.
Asefru n tezlit »yella usirem » :
Kedym Steqsaɣ iman-iw D acu i d-yeqqimen Tutlayt n lejdud-iw Deg-s yal agezzren Timest tettenfufud Ijijaḥ aɣ-d-ttawḍen Ini-d a dda Lmulud D acu akka i d-aɣ-yuɣen Zedek Mouloud Xas timest tettenfufud Tadukli ad as-nerr afud Ad nemyuṭṭaf ifassen Akken ur tt-gezzren Imi tedder ar ass-a Mazal u mazal ad tidir Deg wakal tenta tgersa Amekraz ad tt-yeskerkir Kedym Ini-d d acu i d mazal Di tmurt n Leqbayel Yal wa anda yemmal Nugi ad neddakel Mazal nettnaɣ ɣef ulac Nesserwa i waεdaw taḍsa Gar-aneɣ nettemkarrac Mazal nettnaɣ ɣef tlisa Zedek Mouloud Di tudrin si zik akka Am wass-a am uzekka Xas ma nettdir s ccwal S tinna ad nferru timsal Mi nekker ad nebḍu Dɣa din ad neddakel Yal mi ara d-isuḍ waḍu I tegmat ad d-nessiwel Kedym Nwala ansayen ttruḥun Wid-ak i ṭţfen tajaddit S iḍarren yeqqel uqelmun Ini-d ta ma d targit Nuki-d a lheǧna-k ay ul Nufa-d yal ci ibeddel Ayen akk llan d azamul Di tmurt-nneɣ yettwagdel Zedek Mouloud Xas ma yettwagdel Lasel ad yeqqim d lasel Ayen illan d tajaddit Ad yeqqim d taqbaylit Ilaq ad nehrez lsas Deg ufus-nneɣ i d-qqim Ilaq ad nesεu tissas Gmat-neɣ ur ten-tt-deqqim
*Imeslayen n tezlit n umedyaz Fahim Mesɛuden.
Tameddurt n Kedym
Anwa Aqbayli ur nessin ara acennay ḤMIDUC ? ad fell-as yaɛfu Rebbi. Anwa ur nesli ara i ṣṣut-is ? Anwa ur zzuznent ara tezlatin-is ?. ḤMIDUC i aɣ-yeǧǧan deg useggas n 2002. Xas yemmut mazal yeqqim-d ccna-ines. Xas yeǧǧa-aɣ, yeǧǧa-d arraw-is, i iḍefren abrid-is. Lǧedra-s tefka-d ixulaf d-yemɣin deg ugni n ccna : Karim icennun s teqbaylit d Kuseyla icennun s tefransist.
Karim d axalaf n ccna n teqbaylit. Ṣṣut-is, taɣect-is d imeslayen-is ttaken anzi ar tezlatin n baba-s. Am snat n tmeqwa n zzit. Aẓawan-ines ileqqem-it s txellalt n uẓawan atrar d-yefkan ijeǧǧigen yessedhayen tameẓẓuɣt.
Krim XEDIM s yisem-is n ucennay KEDYM, illul-d 23 yennayer 1990, di temdint n Tizi wezzu. Yedder iseggasen-is imezwura di taddart n lejdud-is ƐEṬṬUC d-yezgan di tɣiwant n Makuda. Anya n uẓawan yekcem tameẓẓuɣt-is, asmi i sell imi yettwali baba-s icennu deg uxxam. D amecṭuḥ yelmed yetturar amundul, i as-d-yeǧǧa baba-s. Yebda yessenṭaq-d inzizen n umundul kra si tezlatin yecna baba-s.
Asmi yesɛa setta (6) iseggasen tawacult-is tunag-d ar tmurt n Fransa. Qqimen zedɣen di temdint n Marsay ar ass-a. Xas akken yettidir di tmurt n Fransa gar iṛumyen, maca ur yettu yara taqbaylit-is id-yeṭṭeḍ deg yidmaren n yemma-s. Yettmeslay-itt, icennu s-yess.
Asmi d-yemrured yebda amɛebbar d ddunit. Ur d-yufi ara abrid ara t-yessufɣen. Yeddem iguǧa ɣer lɛesker di Fransa, yeqqim dinna 5 n yiseggasen. Xas akken d imgaǧi, mazal-it yeṭṭef yetturar amundul. Icennu di tmeɣriwin di temdint n Marsay akked Lpari. Yuɣal snent lɣaci belli d mmi-s n ḤMIDUC.
Asmi d-yeḥbes di lɛesker. Igzem-itt di ṛṛay-is ad yekcem deg wannar n ccna s wudem unṣib. Anda yaɛreḍ, yeɛɛawed yessekles tizlit n baba-s « Lemḥibba-m temmut », yerna yessuli-as l-klip. S ṣṣut-is aḥlawan, yettaken anzi ar taɣect n baba-s, d uẓawan-is yettuleqqmen s wallalen n wass-a. D tizlit iɛeǧben aṭas, aladra ilmeẓyen.
Deg useggas n 2016 yemlal d umedyaz Fahim MESƐUDEN, Aṭas n yisefra i as-yexdem yecna-ten. Deg useggas n 2017, yessekles tizlit-is tamenzut, yerna-s l-klip, azwel-ines « Aɣyul yezga iɛebba » anda d-yewwet s leqseḥ ɣef yir liḥala tettidir tmurt, d wugdud yarwan lḥif. Attan tseddart si tezlit :
Ttwaliɣ-kem kullas tettruḍ Deg yiberdan tettsuɣuḍ Hudden-am lsas-im ɣef tegrawla ad d-ḥekkuḍ Mazal-ikem ur tettuḍ Idammen n warraw-im Mazal-ikem tkennuḍ Tettɛebbiḍ trennuḍ Teclex tezmert-im
Ur iɛeṭṭel ara yesseḍfer-d tizlit n tayri s l-klip, azwel-ines « Dayen », s imeslayen ḥninen, ẓiden. Anda i as-yeqqar :
Lḥebs deg-i tzedɣeḍ Medlent tewwura-s Ur tezmireḍ ad d-fɣeḍ I ddiq n temḍellas Winna akken tesneḍ Winna akken i tḥemleḍ Ur bɣin ad t-mlileḍ Baɛden-kem fell-as
Aseggas n 2018, yerna yessekles tizlit niḍen s l-klip, anda d-yesseqcer leǧruḥ n isdawanen akked yir liḥala n yilmeẓyen yeɣran qqimen mebla axeddim. D wid akk d-yewwin igerdasen-nsen ur d ufan iqiḥ, ala asenned ɣer leḥyuḍ. Ur ẓrin acu ara xedmen wala anda ara ddun. Tiwwura akk medlent sdat-sen. Attan tseddart deg usefru n tezlit :
Leqraya telha Anda s-fkan azal Mačči d timucuha Mačči kan d awal … Nevɣa tamussni Aɣ-tawi ar sdat Ayen i nettmenni D igenni n tafat … Neɣra armi ncab Nuɣal ur neswi Ayen akk n-nɛettab Ur yesɛi amdawi
Gar isentalen ad d-naf daɣen yiwen yesseḥzanen aṭas aṭas. « Sliɣ inɣa iman-is »
Sliɣ yenɣa iman-is Anda ur yelli yiwen Sliɣ s lmut-is ɣlin-iyi-d imeṭṭawen. Si zik yerwa lḥif Tugi ad ttbeddel fell-as Temẓi-s yewwi-tt wasif Yezdeɣ di temḍellas Yal ass yettxemmim Ur as-d-yufi ixef-is Waḥd-es mi yeqqim Iruḥ iɛelleq iman-is ...
KEDYM abrid-is yenǧer ar ccna s teqbaylit. Yebɣa ad d-yernu taḥjurt-is ar wannar n ccna n teqbaylit. Xas ma abrid ḥercaw, maca tabɣest yesɛa akked tayri t-yeqqen ar ccna yettwali ur yettwali ara uguren ara d-yeǧǧen ur yettaẓ ara ar ccna.
