« ILES, TIMES » d azwel-agi i yefren umedyaz n temnaḍt n Leɛzib, i wammud-is wis kraḍ n tmedyezt. Yeffeɣ-d ɣer teẓrigin n Ccix Muḥed Ulḥusin, deg useggas n 2019.
Yebḍa wammud-agi ɣef 48 n yisebtar, ddan-d deg-s 21 n yisefra, yal yiwen ɣef wacu i d-yewwi. Tazwert d tira s uselkim llan-d s lmendad n massa Belḥusin Naṣira. Adlis-agi yettnuzu akk di tnedlisin n tmurt Taqbaylit, s wazal n 150 n yidinaṛen.
Amedyaz ibudd ammud-ines « Iles, times » i tmeṭṭut-is d warraw-is, i warraw n tmurt-is, d yimedyazen anda ma llan, war ma yettu massa Belḥusin Naṣira i s-yefkan afus n tallelt deg leqdic-ines.
Gar yizwal n yisfra i d-yeddan deg udlis, ad naf : asmekti n tefsut, lmizan, tirga n uzal, ansayen n tayri, yefsex wahil-iw, abrid n nndama, d lawan, d akniwen ur myussanen, mmi-s n Cacnaq, … d wiyaḍ.
Agzul ɣef tudert n umedyaz
Mas Muḥemmed Ḥaǧimi, ilul di taddart n Cedeṛ, i yeṭṭafaren taɣiwant n Leɛzib, di Bumerdas, deg was n 15 di ctembeṛ n useggas 1941. Asmi yesɛa 16 n yiseggasen i yebda yettaru tamedyezt. Mi yekcem 22 yekki deg tedwilt n Ccix Nuṛeddin iwemi isemma « iɣennayen iḥeffḍen » i d-yettɛeddayen deg umaṭṭaf wis sin n Teqbaylit.
Ameskar n i d-tefka Cendeṛ, d win yessefrawen ɣef waṭas n tlufa d temsal, gar-asen-t ugur n tmetti neɣ n umdan, izerfan, tasertit, tayri, d temẓi, yerra ula d tijmilin i yinaẓuren, imeɣnasen, d wid yeẓra uklalen. Ladɣa tasuta-nni i yessulin aswir n Teqbaylit d asawen.
Mas Ḥaǧimi, yekki deg xilla n temliliyin d tfaskiwin n tmedyezt i d-yettilin sya ɣer da di tmurt n Yiqbayliyen. Iɛedda-d yakan seg tfaska n Tmizar deg Wat Jennad, Itri Adelsan n Uqbu, Adrar n Fad deg Ayt Smaɛel, d tiyaḍ di Bumerdas d Tizi Wezzu. Deg useggas n 2012 yettunefk-as warraz n wemɣar deg tfaska i d-tessuddus yal ass aseggas tiddukla tadelsant « Adrar n fad », tafska-agi d tajmilt i umusnaw Aqbayli Mulud Mɛemmeri.
Ɣas akken yebda yessefraw mi yella d ilemẓi, maca ur as-tettunefk ara tegnit iwakken ad yessaẓreg ammud almi d aseggas n 2009, yefka-as azwel « Tudert n umedyaz ». S wammud-agi yerra tajmilt i umedyaz d unaẓur s umata, kraḍ n yiseggasen neɣ di 2012, yerna-d ammud wis sin, isemma-as « Kcem sya teffɣeḍ syin », ddan-d deg-s 20 n yisefra. Aneggaru-ines yeffeɣ-d deg useggas n 2019.
Mmi-s n Leɛzib, ɣas akken yedda deg leɛmeṛ, maca mazal yesɛa tabɣest, werǧǧin yenna ɛyiɣ, mazal-it yessefraw, iteddu sya ɣer da, ma yettwanced anida n kra werǧin ad yezgel tinnubga. Rnu ɣer waya d win yessawalen ɣer tegmat d tdukli, inehhu ilmẓiyen ɣer wayen yelhan.
Ammuden i d-yessaẓreg
Tudert n umedyaz, 2009
Kcem sya teffɣeḍ syin, 2012
Iles, times, 2019
