Iselmaden n tutlayt d yidles Amaziɣ, d yiɛeggalen n tesɣeunt « Aselmad », imassanen Lyas Belɛid d Mhenna Ḥalit, berrḥen-d s ttawil n facebook i usujed n wuṭṭun wis ṭam n tesɣunt Aselmad.
Imḍebbren n tesɣunt gran-d tiɣri ama i yimskaren neɣ i wid yettarun iḍrisen, wid i d-yettheggin timsirin i yinlmaden, neɣ d tamedyezt, neɣ d ayen nniḍen, ad d-aznen iḍrisen-nsen s talɣa n word ɣer snat-agi n tansiwin:
I usmekti, yesfek ɣef yimekkiyen ad d-aznen iḍriseni-nsen send ass n 15 di duǧembeṛ n useggas-agi n 2020.
Uṭṭun amezwaru n tesɣunt « Aselmad » yeffeɣ-d deg useggas n 2017. Nesteqsa aselmad n tutlayt d yidles Amaziɣ mass Belɛidi Lyas, yenna-d: « Nettɛraḍ akka, nessuffuɣɣ-d sin n wuṭṭunen deg useggas. Akka tura nessuffeɣ-d 07 n wuṭṭunen, wis ṭam aqlaɣ ad nettheggi, ahat ad d-yeffeɣ deg taggara n waggur n duǧember, neɣ ad tneǧ i useggas amaynut ».
Ɣef yiswi n tesɣunt, mass Lyas yenna-d : « asmi nekcem ɣer uɣerbaz, nufa yella lexṣaṣ deg yiḍrisen i d-ttadamen yislmaden, sɣarayen-ten i yinlmaden, neɣ ttaran-ten d ikayaḍen. Dɣa nenna, acuɣer ala mačči d nekkni s yislmaden ara d yesnulfun iḍrisen d imaynuten, ara yeddun d unelmad. Akken daɣ i nettɛaraḍ ad d-ilint akk twessatin n tsekla d wanawen-ines D wagi i d iswi agejdan, ma yehwa-ak ad s-nsemmi asnulfu.«
« Iswi wis sin, nra ad nefk tagnit i yislmaden, d yinlmaden, iwakken ula d nutni ad d-ttarun iḍrisen. Ula d imeskaren, imedyazen, imeɣnasen, d kra n wid iḥemmlen Taqbaylit zemmren ad d-kkin yid-nneɣ. Iswi-nniḍen, nessaram sya d afella tasɣunt-nneɣ ad d-teffeɣ s talɣa n lkaɣeḍ, acku di tallit-agi mazal-itt tetteffeɣ-d s talɣa n PDF. Nettnadi amer ahat ad d-naf tifrat i wugur-agi« .
