Aṭas n yimura i yeččan tiyita, uɣentent kan ar daxel susmen. Ttarun s tayri s nniya, snulfuyen-d, acku ḥemmlen taqbaylit. Amaru ad yarreẓ aqerruy-is, ad yefk lweqt-is akken ad yaru adlis, ad t-yefk i wid t-yugaren di tmussni, ad t-ɣren, ad as-d-fken ṛṛay-nsen d wanda ixuṣṣ, yal tamawt ad tt-yesseɣti, ar tagara ad as-d-arun tazwart, maca akken kan ara yekfu udlis-nsen, ad inadi ɣef teẓrigt akken ad t-id-yessufeɣ, dɣa din ad d-yemmager adrar n wuguren sdat-s. Kra yesserwet ad t-εebbin wiyaḍ, amaru Aqbayli meskin.
Ad yawi adlis-is ar teẓrigin, dɣa din din ad t-εeqlen d amaynut, ad bdun lqalabat-nsen, ad zuɣren ad t-ttawin di ḥawlala, deg wass ar wayeḍ, ad tturaren syess alarma yuyes. Ma ur yuyis ara ad inadi ugar ad yefhem. Dɣa as-d-inin : « adlis ad t-nefk i tesqamut n tɣuri? », ad yamen ad yerǧu umaru Aqbayli meskin.
Aseggas wayeḍ ad yuɣal alarmi d ɣur-sen, ad as-inin adlis-ik ixuṣṣ… Netta d abujad, ur yessin ara, yessen kan ad yaru, yessaram kan ad d-yeffeɣ udlis-is akken ad d-yernu ɣer temkerḍit n tsekla taqbaylit. Yeqbel ad yexser netta akken ad yesserbeḥ taqbaylit. Dɣa din ad as-d-sutren idrimen. Idrimen n umaru Aqbayli meskin.
Dɣa ad yilqiq wul-is, ad d-yemmekti leεtab-is, ad yemmekti taqbaylit-is, ad yewwet ar lǧib-is ad ixelleṣ tafunast d mmi-s, adlis-nni yura s ufus-is, s tidi-s. Tadrimt ara d-yekkes si laẓ-is akken ad isečč taqbaylit, umaru Aqbayli meskin.
Mi d-yeffeɣ wadlis ad d-yaf iman-is di tlemmast n udlis-is waḥd-es, ad yettxemmim amek ara d-yerr idrimen-is. Dɣa ad d-azlen yimdukal-is ad aɣen yiwen yiwen, imdukal n yimdukal-is, tawacult-is n umaru Aqbayli meskin.
Mi iεedda wayen iεeddan ad d-yaf belli d awezɣi ad d-yerr ssuma i swayes ixelleṣ adlis-is. Ad yeεreḍ ad yaru adlis wayeḍ maεna mazal-it yettxemmim ɣef udlis-is amezwaru amek ara ad t-yessufeɣ, yeẓra xas yura adlis wis sin, yewwi-d fell-as ad ixelleṣ daɣen tafunast d yelli-s akken ad d-yeffeɣ ar ssuq. Yuyes yeεya umaru Aqbayli meskin.
Maεna tɣaḍ-it teqbaylit ur yezmir ara ad tt-yeǧǧ. Ikemmel tira n wadlis-ines wis sin, yekfa-t. Yuzen-it ar teẓrigt niḍen. nnan-s : »ad t-nɣer ak-inerr s isalli ». Akken sin wagguren rran-as isalli : »adlis-ik neɣra-t iεǧeb-aɣ, ak-t-id-nessufeɣ« . Dɣa yefreḥ, yuɣal-it-id usirem umaru Aqbayli meskin.
Ṭṭfen adlis-is, yeḥder imi tesseɣtan. Stenyan amtawa, fkan-as 10%. Yeffeɣ-d wadlis ar ssuq, yewweḍ akk tinedlisin n tmurt anda yella Uqbayli, win inudan fell-as yuf-at, yufa ayen yura umyaru Aqbayli meskin.
![](https://vava-innova.com/wp-content/uploads/2020/11/Anza-tira.jpg)