Seld timsizzelt n Racid Ɛellic n wungal ifazen, i d-tessuddes yal aseggas tesbeddit takanidit « Tiregwa » akked warrazen Muḥemmed d Asiya Ǧebbar i yernan ungal Aqbayli (Amaziɣ) ɣer wahil-nsen. A-t-an deg useggas-agi n ukman, d tanmehla n yidles n tẓuriwin n tama n Tizi Wezzu i d-yegren irebbi, tessawel-d i temsizwert tamezwarut n wungal.
Tanmehla n yidles d tẓuriwin n lwilaya n Tizi Wezzu tberreḥ-d s wudem unṣib s temsizwert n wungal n ifazen s Teqbaylit (Tamaziɣt). Timsizwert-agi teldi tiwwura-is i yakk imeskaren n yiles Amaziɣ.
Yessefk ɣef yimeskaren, ad d-kkin s wungalen-nsen i d-yeffeɣen seg yennayer 2019 ɣer duǧember 2020, akka i d-tberreḥ tenmehla n yidles d tẓuriwin deg wulɣu-ines.
Imekkiyin yewwi-d fell-asen ad d-ssersen sḍis n yimedyaten seg wungal-nsen, akked ugzul, akken daɣ i d-yewwi fell-asen ad jerrden isallen yerzan azemz n tlalit-nsen, amahil d wayen-nniḍen (CV). Asiher aneggaru n usras n wungal ad d-yili ass n umenzu n yennayer (12 janvier 2021).
Ad d-ttwaberrḥen yigemmaḍ n temsizwert-agi tamezwarut ass n 23 deg yebrir 2021, ilmend n wass amaḍlan n udlis akked izerfan n umeskar. Ar tura tanmehla n yidles d tẓuriwin teṭṭef 07 n wungalen. Isalli-agi yeffeɣ-d seg yimi n tnemhalt n yidles n ugezdu n Tizi Wezzu, i d-tefka i tɣamsa deg yiwet n temlilit.
Di tagara n wulɣu, imsuddsen n temsizwert-agi tamezwarut, nnan-d d akken, arraz ara fken i umeskar ara d-yufraren, tanmehla n yidles d tẓuriwin ad d-taɣ fell-as aḥric d ameqqṛan n wungalen, akken daɣ ara s d-theggi timliliyin tiseklanin d yisaragen, anida amaru ara d yehḍer ɣef leqdic-ines, wa d-yessenz idlisen-ines s ubuddu.
