Deg wussan-agi yezrin i d-yeffeɣ wammud amezwaru n tmedyzet n yilemẓi Bṛahim At Saɛid. Yefren umedyaz azwel i udlis-ines : « Tageldunt-iw n tirga ». D ammud i d-yeffɣen ɣer uxxam n teẓrigin Imru, i yellan deg yiɣrem n Tizi Wezzu. Ddan-d deg-s 73 n yiḍrisen. D imedyaz n tayri i d-yefren, i yebɣa umedyaz n Taqqa n At Yeḥya ad d-ddun deg udlis-agi.
Akka tura, ammud « Tageldunt-iw n tirga », yettnuzu deg tnedlist « Ccix » n Tizi Wezzu, tanedlist-agi tettwassen nezzeh ɣer yimeɣriyen Iqbayliyen, d wid iḥemmle adlis, yettnuzu daɣen deg kra n tnedlisin deg Micli, si leɛḍil ad d-yaweḍ ɣer tamiwin-nniḍen tmurt n Yiqbayliyen. D ammud i yettnuzun s 300 n yidinaṛern. D amedyaz-ameskar s timmad-is i igan tazwert i wammud-is amezwaru.
Agzul ɣef tudert n umedyaz
Ilul umedyaz Bṛahim At Saɛid deg wass n 06 di tubeṛ n useggas 1983, di taddart Taqqa n At Yeḥya, di temnaḍt nƐin Lḥemmam, i yettwasnen s yisem n Micli. D win yebdan tira n tmedyezt asmi yella deg yiseggasen-ines n ɛecrin.
Amedyaz n Taqqa n At Yeḥya iḥemmel akk inaẓuren d kra iqeddcen ɣef Teqbaylit, gar-asen : Si Muḥ Umḥend, Muḥya, Feṛḥat, Meεtub Lwennas, Ayt Mengellat, Farid Ferragi, Ḥasen Aḥris, Lani Rabeḥ, d waṭas nniḍen.
D win yettaken tameẓẓuɣt i yak imeyazen Iqbayliyen, ula d netta si tama-ines yettɛaraḍ, yettaru. Yessefraw ɣef yisental akkit, ama ɣef tayri, Taqbaylit d wazal-is, timetti d wuguren-is, tamurt d ccbaḥa-ines, akken daɣ i yettar tijmilin i wid yuklalen, d wid yessulin aswir n tutlayt Taqbaylit d asawen.
Yeqqaṛ umedyaz deg yiwet n tukkist n usefru iwemi isemma » Ala Kem «
Γur-i nekk ala udem-im
Ulac sennig-m ccbaḥa
D tamuɣli n wallen-im
Ad ttawiɣ ɣur-s ccbihaD tameṭṭut s wazal-im
Ttwaliɣ-kem d amedya
Tedda lhiba di later-im
Tifeḍ tizya-m meṛṛaΓur-i d azamul yisem-im
D tageldunt n tirga
S yiḥulfan-agi n tayri-m
D asugen war tilisa
