Deg wussan-agi yezrin i d-yeffeɣ s wudem unṣib wungal amezwaru n tlemẓit-taselmdt Zohra Aoudia ɣer uxxam n teẓrigin « Achab » i yellan deg yiɣrem n Tizi Wezzu. Tazwart n wungal-agi tell-ad s lmendad n umaru-aselmad Saɛid Cemmax. Ddan-d deg-s 104 n yisebtar, tebḍa-t tmeskart ɣef semmus (05) n yixfawen {Chapitres}. Unuɣ n tduli yella-d s ufus n tnaẓurt Kacel Aziza.
Ungal-agi d win ara yettwazzuzren deg kra n wussan i d-iteddun deg akk tnedlisin n tmurt n Yiqbayliyen, am tid n Tubiret, Bgayet, Tizi Wezzu, d tamiwin-nniḍen. D adlis ara d-yesqamen s ssuma 350 n yidinaṛen.
Ciṭ seg tudert n tmarut
Tlul tmessiwt Zohra Aoudia deg yiseggasen-nni n tmanyin, deg Yifeṛḥunen, d illi-s n taddart Taxliǧt At Ɛettu, di temnaḍt n Micli. Tesɛa agerdas n master deg tesniselt, tewwi-ti-d seg tesdawit Mulud Mɛemmeri. Akka tura a-tt-an d taselmadt n tutlayt d yidles Amaziɣ deg tesnawit n Ɛebban Remḍan i yellan deg yiɣrem n Tizi Wezzu.
Ugar aya tilemẓit Zohra, tettaru iḍrisen s yisental yemgaraden, tekki yakan deg tesɣunt « Aselmad » s sin n yiḍrisen, yiwen tefka-as azwel : « Jida Ḥemmu » wayeḍ « Abrid ɣer lɣerba ». Iḍrisen-agi ffɣen-d deg wuṭṭunwis 07 n tesɣunt-agi, di yebrir yezrin n useggas-agi. Rnu ɣer waya tettehheggi isenfaren-nniḍen.
Tukkist seg wungal
Tanezzayt, tanezzayt yemma tehlek ; lehlak yettzad irennu. D aqṛaḥ ur necbi wiyaḍ ! Ṭṭefen-tt igunas, weḥdes deg tesga ; Bɣiɣ a d-ffɣeɣ ɣas tɣaḍ-iyi. Tennɛtab. Ẓriɣ, meɛna ilaq a d-laleɣ. Lmalayekat, ttḍeqqirent-iyi-d akken ad ffɣeɣ ; aẓekka, yeldi imi-s akken ad uɣaleɣ ɣer wakal anda akken i d-fruriɣ. Ula d nekk ḥreḥreɣ ; lmut, tekkes-d aksum-iw, tẓemmi deg teṛwiḥt-iw. Bɣiɣ ad suɣeɣ ṣṣut ur yelli ! Deg tɛebbuṭ-is la ttnaɣeɣ.
Teṭṭef addud, d lawan ! Bdiɣ tteffɣeɣ-d ; sliɣ-d i kra n tlawin uwḍent-d. Γer lqaɛa mi d-ccḍeɣ, d taqcict i d-luleɣ, texṣer tfekka, d tazegzawet i uɣaleɣ, ugiɣ a d-suɣeɣ ! Teqwa-tt ddaɛa. Yiwet : « Ad yeg ṛebbi ur teddir ara, aneft-as ad temmet, ur tt-nebɣi ara ! Awi-d kan ad temneɛ yelli ». Tayeḍ : « Neɛya deg teqcicin. Ad yekkes ṛebbi iziɣer-is, ma temmut axiṛ, ula d lmut d tuṣṣra. » Mačči akka i ɣileɣ ! Bɣiɣ ad uɣaleɣ ! Ugadeɣ !…
