Muḥemmed Gaya ilul deg wass n 30 deg wayyur n mayu n useggas 1974. D mmi-s n taddart Tiɣzert i yeṭṭafaren taɣiwant n At Ɛisi, di temnaḍt n At Dwala. Seg temẓi-is i iḥemmel idles d wayen icudden ɣer yiẓuran n Teqbaylit d Timmuzɣa. D aya i t-yeǧǧan ad yekcem annar n timeɣnest d amecṭuḥ.
Deg useggas n 1989 mi d-tlul tiddukla n yedles d tussna tamezwarut s wudem unṣib, tiddukla-agi fkan-as isem « Idles », Muḥemmed yekki deg-s, din i yelmed ilugan n tira d umezruy n lejdud-is, almi d aseggas n 1993. Syin yuɣal d aselmad ula d netta s timmad-is.
Seg useggas n 1991 almi d 2003 yella d aɛeggal deg tesqamut n tɣiwant n At Ɛisi, deg ukabar Tirni Iɣallen Inemlayen (FFS), deg useggas n 1994 yella seg yiɛeggalen i d-yeslulen tanmiregt n tiddukla « RAJ » di Tizi Wezzu. Rnu ɣer waya deg useggas-agi i s-yettunefk uselkin n uselmad n tutlayt d yidles Amaziɣ. Dɣa seg yimir-nni yelha-d d uselmed n tutlayt-is deg temnaḍt-is d tudrin i s-d-yezzin.
Deg useggas 1995 yuɣal d aselway n tenmiregt{Section} n tiddukla « IDLES » deg At Dwala. Syin yekcem deg tuddsa tazzayrit n useḥbiber ɣef yizerfan n wemdan, anda yekki deg waṭas n leqdicat d temliliyin i d-yellan ɣef tugdut, talwit.
Deg waggur n ɣuct n useggas 1997 yettwanced ɣer Las Palmas di Tegzirin Tiknaṛiyin, iwakken ad yekki deg leqdic n tlalit n Ugraw Amaḍlan Amaziɣ (CMA). Ikemmel deg leqdic asertan d yidles, yettṛuḥu sya ɣer da. Deg useggas n 1998 yella d iminig di Galma, yebɛed ɣef uxxam d twacult, yebɛed ɣef tmurt Taqbaylit, mi s-yewweḍ yisalli n tmenɣiwt n uzamul Meɛtub Lwennas,Muḥemmed Gaya rrẓen-as yifadden yečča tiyita ɣer wul, teǧǧa-d deg-s iɣisi ur nḥellu.
Deg useggas n 2000, mmi-s n taddart Tiɣzert, yeqqel d aselway n usmil {Comité} adigan{Local} n « Lsas Maɛtub » n Wat Dwala, akken daɣ i yella d aɛeggal deg useqqamu-ines n tedbelt. Deg useggas n 2001 yebda yettaru imagraden deg-s Teqbaylit deg uɣmis IẒURAN-RACINES. Mi tetterḍeq tefsut taberkant, am netta am yilemẓiyen n tallit-is, yekki deg tmesbaniyin, akked uslal n umussu aɣerman, deg-s yeqdec aṭas.
Deg useggas n 2008 yella seg wid yekkin deg uslal n usmil « Tidet d teɣdemt ɣef tmenɣiwt n Lwennas Meɛtub ». Deg useggas-agi i yuɣal d aɛeggal Ugraw Amaḍlan Amaziɣ, akken diɣ yeqqel d imḍebber deg useqqamu-ines afidirali. Di ɣuct 2010 yekki deg temlilit tis 77 n « CRED » (Comité pour l’élimination de toutes formes de discrimination raciale) i d-yellan ddaw leɛnaya n tuddsa n ONU.
Deg useggas n 2011, yekcem ɣer INALCO, deg yiswi ad yesnerni aswir-ines deg wayen yerzan tutlayt d tɣerma n Yimaziɣen. D aya-gi i s-yeldin tawwurt ɣer uselmed n tutlayt Taqbaylit deg tiddukla AKFIF i yellan di Cergy. Seg tubeṛ 2019 yettwafren d amaray amatu n tiddukla-agi.
Deg waggur n ctembeṛ n useggas-agi yessuffeɣ-d adlis-ines wis ukuẓ, s uzwel : Timsirin n tjeṛṛumt n Tmaziɣt (Taqbaylit) deg uḥric-ines wis wis sin. Aḥric amezwaru n tewsit-agi yeffeɣ-d deg fuṛaṛ 2019. Akken daɣ i d yessaẓreg deg useggas n 2008 adlis s uzwel « Anazbay » yura-t ɣef tudert d leqdic n Lwennas Meɛtub. Adlis-ines amezwaru yessuffuɣ-iti-d deg 2006, isemma-as « Amennuɣ n tidet ». D adlis i yura ɣef tefsut taberkant d wayen swayes i d-tegla. I usmekti idlisen n mass Gaya ffɣen-d akkit i ddemma n bab-is{A compte d’auteur}. Ttnuzun deg waṭas n tnedlisin di tmurt, akken daɣ i llan deg yinig.
