Karim Tizuyaṛ, ilul deg wass n 02 deg wayyur n meγres n useggas n 1963, di Sidi Mḥemmed. D mmi-s n Cap Sigli (Iksilen), maca yemɣur-d deg taddart Agni n Tazart, i d-yezgan deg tɣiwant n Leqṣer, i yeṭṭafaren tamnaḍt n Yemma Guraya, di tmurt n Yiqbayliyen. Seg temẓi-is iḥemmel ccna, asmi yesɛa 13 n yiseggasen deg tudert-is yessen ad yewwet adinan (Mendole), yerna yessenṭaq-it. Tagambart-is tamezwarut d netta i ti-d-yesnulfan i yiman-is s yifassen-is.
Di taggara n useggas 1984 ɣer tazwara n 1985 yemyussan netta d ucennay Buǧemɛa Semɛuni i yellan deg terbaɛt yettwasnen « AGRAW ». Msefhamen, zdin deg terbaɛt-agi. Di tallit-nni Karim ad yesɛu 21 n yiseggasen, yezger ɣef Fransa, din i yessekles netta d Buǧemɛa tasfift, ur tɛeṭṭel ara teffeɣ-d. Din i d-yufrar s tezlit-ines « Ay aḥdiq awi-tt ».
Deg tazwara n 1986, skelsen tasfift-nniḍen, anida i d-tedda tezlit-ines « Ul-iw yedduqus », maca llan-d kra n wuguren, yella wayen ɣef wacu ur msefhamen ara, dɣa yal yiwen yewwi abrid-is. Aseggas d asawen Karim yessuffeɣ-d tasfift-is tamezwarut, ifka-as azwel « Ay agiṭar ». S tesfift-agi yufrar-d, snen-t akk Yiqbayliyen deg ukuẓ n tɣemmar n tmurt Taqbaylit.
Di tmurt n Fransa, Karim ɣas d ilemẓi, maca yeḥṛec, din ixuleḍ aṭas n yicennayen n tallit-nni, am : Racid Mesbaḥi, Sufyan, Mehdi Mzeɣran, Ḥamiduc, d wiyaḍ. Syin d afella iban-d ɣer yidi-s n Ṣaleḥ Seɛdawi. Yexdem xilla n tmeɣriwin d yibarazen. Yecna di ttbaren, di tzeqqiwin, yerra i tinnubgiwin n tiddukliwin. Ama di tmurt neɣ deg yinig.
Deg umecwaṛ-is yecna ɣef waṭas n yisental d temsal, yecna ɣef tayri, tudert n yal ass, temẓi, timetti d wuguren-is, iḥulfan d wayen-nniḍen. Gar tezlatin-is yettwasnen nezzeh, llan-t: Ay agiṭar, asmi akken qqaṛen medden, acḥal i nesheṛ i yitran, deg udem-is tban, weṣṣaɣ-k si zik, a Malika, lḥala n uɣrib, Dawi-yi helkeɣ, d tiyaḍ.
Deg tlemmast n yiseggasen n 1990, yessuffeɣ tasfift n yiklipen (VHS) n kra seg tezlatin-is. Akken daɣ i yekki deg yiwet n tesfift netta d yicennayen-nniḍen n ccna n Teqbaylit, s tezlit-ines « A-tt-an a merwila ».
Deg yiseggas-agi ineggura uɣalent-as ddeqs n tejmilin, gar-asen tinna i s-yuɣalen di tzeqqa n « LA BELLE ETOILE » di Noisy le Grand, di tmurt n Fransa deg wass n umenzu n tubeṛ n useggas 2017. Syin tuɣal-as tejmilt-nniḍen deg tmurt Taqbaylit, deg akal n lejdud-is, deg Leqṣer, ass n 25 di mayu n useggas n 2018. Akken daɣ i yettwanced ɣer waṭas n tedwilin, ama d imaṭṭafan neɣ d tiliẓriwin.
Isalli aneggaru i d-yeffɣen, d akken anaẓur n yiseggasen n 1980, yettheggi aḍebsi, maca ur iban ara i melmi ara d-yeffeɣ. A-t-an yesseklas deg-s ciṭ ciṭ, acku ur yezmir ara ad yexdem ɣef tikelt, imi tazmert-is teɛya. D acu kan ɣas akken yuḍen yettban-d deg yizeḍwa am Facebook d Youtub, tikelt ad yecnu tizlit-is, tikelt d Sliman Ɛazem, Yidir, neɣ d Meɛtub Lwennas, Crif Xeddam, d wiyaḍ.
Tisfifin d yiḍebsiyen i d-yessuffeγ:
Ay agiṭar, 1987
A-tt-an tṛuḥ, 1989
Weḥdi weḥdi, 1994
Susṭa, 2002
Ma nettargu, 2005
Lǧawi, 2010
Mirak, 2019
