IFLIS d acennay s tutlayt n teqbaylit n taddart n TSENNANT (Tigzirt). Ilul-d ass n 8 deg waggur n furar n useggas n 1970 deg yiflisen. Isem-is aḥeqqani Kamel UXENNIC (s tefransist Kamel OUKHENNICHE).
Isurifen-is imezwura deg ubrid n ccna
D ameẓyan yebda wul-is yettmil ar ccna akked turart n snitra. S snitra-ines tamezwarut yebda yeggar iman-is s annar n tẓuri s wudem unṣib d anaẓur; anda yebda icennu deg tmeɣriwin n d-yettilin di taddart-is akked tuddar n Leqbayel sumata. Maca tazarraɛt-nni n tẓuri yeɣlin deg wul-is, tegger iẓuran, temeqqi, tegemmu, teǧǧuǧeg deg ugama n uẓawan tewwi-t ar sdat nnig wayen akken yessarem si temẓi-s asmi yebda tikli snitra deg ufus-is.1 Deg useggas 1987, asmi yella yeqqar deg tesnawit, yesbedd-d tarbaɛt n ccna akked yimdukal-is yeqqaren yid-s, iswi-nsen d leqdic deg umussu adelsan n tiddukliwin. Leḥrara-nni d-yewwi d yimdukal-is ur teḥbis ara kan din, beggsen ruḥen ɛeddan-d di tedwilt n yicennayen uzekka deg umaṭṭaf wis sin.
Talali n tarbaɛt Tind
Deg useggas n 1993, tlul-d s wudem unṣib tarbaɛt i wumi fkan isem : TIND netta akked sin yimdukal-is Muḥend ḤAMI Mohand Hami d Brahim Ḥammam. Ssawḍen skelsen tasfift-nsen tamezwarut, azwel-ines « Siwa kemm-i-nni », d tasfift i hdan i Muḥend Uyeḥya; anda rran daɣen tajmilt i yineɣmasen akked tlawin Tizdayriyin yettwaɛelqen nnig ujajiḥ n tmes n udabu akked iḥeǧuǧa n rrebrab yesserɣayen deg ugdud. Xas akken d tarbaɛt tamaynut, ulac adellel, ur d-mmugren yiwen ad ten-yessebɣes di tallit anda rrebrab yessufeɣ-d tisuqas-is ɣef wid akk ara yilin mmgal tikta-nsen, maca tarbaɛt tbedd, tecna, tasfift-nsen tufrar-d di ssuq, tewweḍ tameẓẓuɣt n lɣaci, xas ma yella-d ustehzi si tama n uxxam n teẓrigt.
Akemmel di ccna beṛṛa n tarbaɛt
Deg useggas n 1999, yunag ar tmurt n Fransa, yeǧǧa tarbaɛt-is war lebɣi-s, maca ur yeǧǧ ara ccna d snitra-s. Iɣas di leqdic waḥd-s, yebda amεebbar deg yinig d wuguren i as-yezzin, xas akken yessaweḍ yessekles aḍebsi-ines waḥd-es azwel-is « Tifirellest ».
Tifirellest d azamul n yinig, yettruḥu yettuɣal gar tmura n umaḍal. Inig yuɛar mačči dayen isahlen, iseggasen ttemseḍfaṛen alarmi d aseggas n 2009, IFLIS yessekles aḍebsi-ines wis sin, azwel-ines « Nfan warrac ». D aḍebsi n 10 tezlatin, d win d-yettmeslayen ɣef yinig, uguren n yilmeẓyen akked wuguren tettidir tmurt aladɣa tamurt n Leqbayel. Deg-s yerra tajmilt i ucennay Maεtub Lwennas.
S uẓawan-ines ḥlawen yezzuzunen, s imeslayen-ines lqayen yeččuren d taqbaylit IFLIS yerna yessufeɣ-d aḍebsi-ines wis tlata deg useggas n 2015, azwel-ines « Tajmilt i Nnuṛ » deg-s 10 n tezlatin. Nnur yellan d amdakel-is, Nnuṛ yellan d aselmad d ameɣnas. D tizlit ideg-i ccnan waṭas n yicennayen, yal wa yefka-d ṣṣut-is akken ad ticbiḥ tejmilt.
ASEFRU « TAJMILT I NNUR, ASELMAD »
Yella walebɛaḍ Yella ulac-it Yella walebɛaḍ Ulac-it yella Keččini telliḍ Ɣur-neɣ ur tefniḍ Mazal ad tiliḍ A Mass n At Aɛmara Nnur d azamul n Leqbayel Nnur d azamul n yimeɣnasen Yella walebɛaḍ Yella ulac-it Yella walebɛaḍ Ulac-it yella S tektiwin teẓẓiḍ S-yissen i-d-terniḍ Aẓru-inek i lḥiḍ, Tebnid i ssur n tmazɣa S tektiwin teẓẓiḍ S-yissen i d-terniḍ Aẓru-inek i lḥiḍ, Ar ɣur-neɣ tellid lebda Nnur Yufrar am zzit ɣef waman Nnur Tanemmirt i tinna i t-yurwen Nnur D tafat n Yimaziɣen Nnur Yufrar am zzit ɣef waman Ay awal, Ay awal yekkan deg wawal A Nnur ay udem n yimmal Ay awal, Ay awal yernan awal A Nnur yegman deg wakal Tamaziɣt, tamaziɣt, tamaziɣt, Ar tufat ay imdukal Tamaziɣt, tamaziɣt, tamaziɣt, Ar tufat ay amdakel
Yecna isefra n Muḥya, Muḥya i iḥemmel si temẓi-s, yeḍfer lǧerra n uɣanib n tmedyazt-is. Di tliwa n uɣanib-is i d-yettagem isefra i tezlatin-is i wumi yeslusuy aẓawan atrar s wayes ttmeslayen akk imẓawanen n ddunit. Muḥya yekker-d syess, icennu taqbaylit-is. Yal tizlit ad d-naf deg-s ticcert n leqdic n Muḥya, yal aḍebsi nettmagar-it-id di tezlatin-is, yeslalay-it-id am wanza d-yessawalen, di yal tizlit yettuɣal-d ṣṣut-is.
ASEFRU « ASMI ARA D-YEZZI WAḌU »
Ǧǧiɣ tamurt-iw Wid iyi-iḥemmlen Ǧǧiɣ imawlan-iw Ur ten-ṛwint wallen Di lebḥer nerkeb Di teflukt n tirga Aḍu i d-isuḍen Akk yid-s nedda Asmi ara d-yezzi waḍu Yid-s ad d-neddu Asmi ara tekfu cedda Ad d-nuɣal merra Fukkeɣ leqraya « Diplum » di lǧib-iw Nwiɣ ad ɣelleteɣ Ad ttuɣ laɛtab-iw Tawwurt i ɣer dliɣ Ad tafeɣ temdel Mi zzher ur sɛiɣ Axir ad nerwel Tamurt ɛzizen Ḥuccen-tt ɣef uẓar Deg-s a sserwaten Zuɣren-tt ar yiɣzer Nekni s yilmeẓyen Ur nesɛi leqrar D acu i aɣ-d-yeqqimen Ad ncerreg lebḥer Yewweḍ-d ssfeṛ-iw Aɛwin ihegga Imeddukal-iw Ttraǧun tura Semmḥ-iyi a yemma Ḥader ad iyi-t-ɣucceḍ Lxir-im yeqwa Aṭas i t-ɛettbeḍ Wwḍeɣ-d ar Lpari Tamurt n tirga Ufiɣ mmi-s n ɛemmi D amɛellem n lqahwa Yesterḥeb s-yess-i D acu ara tesweḍ Nniɣ-as : « awlidi Ula deg-i tḥawteḍ Iɣimi n lqehwa Nekk ur tennumeɣ Ttnadiɣ lxedma D laẓ i lluẓeɣ » Yenna-k : « ixeddim Ur cukkeɣ ad tafeḍ Ma ur « tettkunsumiḍ » Xas ruḥ ad tefɣeḍ » Asmi ara tesɛuḍ lullu Yid-s ad d-nelhu Asmi ara tebeddel fell-ak Uɣal-d ar dada-k Asmi ara tesɛuḍ « l’euro » Yid-s ad d-nelhu Asmi ara d-iferreǧ fell-ak Uɣal-d ar dada-k Asmi ara d-yezzi waḍu Yid-s ad d-neddu Asmi ara tekfu cedda Ad d-nuɣal merra
IFLIS ur yeqqim ara kan din, xas uguren yezzin i yicennayen zzin-as ula i netta, uguren usiẓreg yettruẓun ifadden n yinaẓuren, yessefcalen ifadden n wid iqedcen, IFLIS, yerna yessufeɣ-d aḍebsi-ines wis rebεa, deg useggas n 2018, di tmurt n Fransa, azwel-ines : où va le monde. D aḍebṣi n 16 tezlatin yeččuren d isentalen igreɣlanen, deg-s llant tezlatin s tutlayt n tefransist anda d-yezzi i umaḍal deg wayen akk iḍerrun di ddunit ass-a akked tedyanin n rrebrab i yeḍran di tmurt n Fransa, ad naf tizlit : où va ce monde, « tragédie, je suis kabyle, Paris. Paris, novembre 13… d waṭas n yisentalen nniḍen icudden ar tmurt n Leqbayel d teqbaylit, uguren n tmetti, tayri d twennaḍt… ad naf : dda Meẓyan, nnan-iyi, tamurt-iw, a ssimra, tirga mxalfa, tiwizi, tadukli, yemma
Asefru « yemma »
Ayen truḥeḍ ? Truḥeḍ a yemma ɛzizen Acu d iyi-d-yeqqimen Dayen ur kem-ẓẓarrent wallen Yeggra-d d ilem umkan-im Limmer imeṭṭi… Limmer imeṭṭi d-yetterra Fell-am ad ruɣ i lebda Lebḥer ad t-terkeb tawla Ad iluɣ seg yimeṭṭawen-iw Ruḥ … a tinna ɛzizen fell-i Ruḥ … iɣsan-im di rreḥma Ruḥ… mreḥba s tikci Rebbi Ruḥ… staɛfu tura A yemma ɛzizen… Ulac ayen icban ɣur-m Acḥal ɛziz yisem-inem Meqqar, ẓẓay lxir-inem Lǧennet-iw ddaw uḍar-im Am rrezg-is… Am rrezg-is win mi d-teɛfa yemma-s Ur yettidir s ndama-s Yal ass yesbur talaba-s Ad t-temneɛ i yir taswiɛt
Tizlit tragidé cnan deg-s rebεa icennayen igreɣlanen yella gar-asen : Pajaro Canzani n tmurt n Uruggway yecna s tespenyulit, Ruby Landeenn n tmurt n Kalifurya tecna s tegnizit, Sebka n tmurt n Fransa yecna s tefransist. Am yal tikelt, IFLIS yessikiy imẓawanen yetwasnen deg wumaḍal akken ad iseggem akken ilaq tizlatin n uḍebsi-ines; yessemlalay-d ula d icennayen d trebbuεa n tmurt Leqbayel, am wakken yuɣ tannumi; dayen ara d-naf di tezlit tadukli anda tecna terbaεt n tlawin tiliwa akked umedyaz Murad BAKIR.
D aḍebsi ara d-yeffɣen daɣen di tmurt deg waggur-agi n yebrir s uzwel : « A SIMRA » di teẓrigin » IRATH MUSIC. Deg-s ad ddunt kan 12 n tezlatin, gar-asent : dda Meẓyan, nnan-iyi, tamurt-iw, a ssimra, tirga mxalfa, tiwizi, tadukli.
IḌEBSIYEN-INES
- -« Siwa kemmini » yeffeɣ-d deg useggas n 1997
- -« Tifirelest » yeffeɣ-d deg useggas n 2004
- -« Nfan warrac » yeffeɣ-d deg useggas n 2011
- -« Tajmilt i Nur » yeffeɣ-d deg useggas n 2015
- -« A simra » yeffeɣ-d deg useggas n 2018
TIVIDYUTIN
- « Ahruhu » yeffeɣ-d deg useggas n 2011
- « UR nessussum ara » yeffeɣ-d deg useggas n 2012
- « Arrac » yeffeɣ-d deg useggas n 2013
- « Ad yezzi wadu » yeffeɣ-d deg useggas n 2014
- « Tajmilt i Nur » yeffeɣ-d deg useggas n 2015
- « Ad anruh » yeffeɣ-d deg useggas n 2016
- « Novembre 13 » yeffeɣ-d deg useggas n 2017
Yettheggi tizlit l’klip azwel-ines « tagrawla » d-asebter ɣef umezruy n tmurt-nneɣ.
