Salim Benxilfa, ilul deg wass n 29 di mayu n useggas 1986. D ilemẓi i d-tefka taddart n Yickaben, i yeṭṭafaren lɛerc n Yimellaḥen, di tɣiwant n Ferɛun. Yefruri-d seg twacult n umedyaz Lbacir Amellaḥ.
Seg temẓi-is iḥemmel taẓuri d yidles, d aya i t-yeǧǧan ad yegmu deg umussu asduklan. Deg uɣerbaz amenzu n taddart-is i yebda taɣuri, syin ikemmel di Bgayet, almi d aseggas n 2006 mi d-yewwi akayaḍ n bakaluṛiya. Syin yefren tasdawit n Ɛebd Ṛeḥman Umira i yellan di Terga Uzemmur, din i yeḍfer aḥric n Génie civil. Mi yekfa di Bgayet, iṛuḥ ɣer ENFP n Sṭif, din yeɣra ayen yerzan tamerrit{Le tourisme}.
Ugar aya, mmi-s n Yickaben, yekki deg waṭas n leqdicat idelsanen, iɛedda-d yakan seg tiddukla tadelsant n Lbacir Amellaḥ, deg-s yeqdec tazmert-is, yura ddeqs n yimagraden i uɣmis n Yimaziɣen (La Dépêche de Kabylie).
D amedyaz i yekkin deg xilla n tfaskiwin, d temliliyin i d-yettilin sya ɣer da di tmurt n Yiqbayliyen, anida i d-yewwi-d aṭas n warrazen. Deg useggas n 2017 yessaẓreg-d ammud-ines amezwaru, yefka-as azwel « Ulamek ». D ammud ara d-tafem yettnuzu akk di temnaḍin n tmurt Taqbaylit.
Salim yexdem ula d tasuqilt, yerra-d kra n yiḍrisen n Kateb Yasin, Ǧebran Xalil, Niẓar Qebbani, d wiyaḍ ɣer tutlayt Taqbaylit. Akken daɣ i yettaru ula d netta iḍrisen s tiktiwin-ines. D aya i t-yewwin ad yessuffeɣ ammud n yeḍrisen deg useggas n 2018. Yefka-as azwel « Nnger », yeffeɣ-d ɣer uxxam n teẓrigin « Ccix Muḥend Ulḥusin » i ɣef yella d aqeṛṛu umedyaz Mebarek Gamar. Ddan-d deg-s 51 n yeḍrisen yemgaraden, yebḍa-t ɣef 124 n yisebtar. Tazwert-ines tella-d s lmendad n massa Abrous Nacera. Yettnuzu s 300 n yidinaṛen.
Ugar aya, Salim ixdem ddeqs n yisaragen d temliliyin, ama di Tmezrit, Buzgan, Aweqqas, Bgayet, Ferɛun, d wanda nniḍen. Deg wakud-agi yeffeɣ-d yisalli d akken yettheggi ungal , d waṭas n leqdicat nniḍen.
