Deg wussan-agi yezrin, i d-yeffeɣ wungal amezwaru n tselmadt n tutlayt d yidles Amaziɣ, massa Samira Ḥusin At Ɛebdelmak (Samira Hocini Ben Abdelmalek), tefka-as azwel « Inig ». Yeffeɣ-d ɣer uxxam n teẓrigin Imal (El Amel), i yellan deg yiɣrem n Tizi Wezzu, di tmurt Taqbaylit. D ungal i tebḍa tmeskart Samira ɣef semmus n yixfaen (05 Chapitres), ddan-d deg-s 96 n yisebtar.
Tazwert n wungal-agi ixdem-itt umaru-ameɣnas Ɛebdeslam Ɛebd Nnuṛ, ma d unuɣ n tduli yemmug s ufus n tlemẓit Tinhinan Ben Ɛebdelmalek, maca tikti-ines tella-d s lmendad n tneggalt. Adlis-agi akka tura yettnuzu deg kra n tnedlisin n temdint n Tizi Wezzu, si leɛḍil ad d-yaweḍ ɣer tamiwin-nniḍen n tmurt n Yiqbayliyen. Ungal-agi yettnuzu s ssuma-ines 350 n yidinaren.
Ciṭ seg tmeddurt n tmarut
D yelli-s n taddart Agni n Tala, i yeṭṭafaren lɛerc n Wayt Yettura, deg Yifeṛḥunen. Samira Ḥusin At Ɛebdlmalek, tlul deg useggas n 1983. Mi d-tewwi agerdas-ines n bakaluṛiya deg useggas n 2003, tefren tasdawit n Mulud Mɛemmeri di Tizi Wezzu, din i teḍfer tutlayt d yidles n Yimaziɣen, almi i d-tewwi agerdas-ines di licence.
Ur tɛeṭṭel ara aṭas, tufa amahil, deg useggas aɣurbiz n 2007-2008 i tebda aselmed n tutlayt d yidles n yimenza-is. Akka tura tesselmad deg tesnawit n umeɣras « Mestafa Ben Bulɛid » di Micli (Ɛin Lḥemmam).
Werǧin i tessarem deg tudert-is ad d-tuɣal d tameskart, neɣ xerṣum ad d-tessuffeɣ adlis. Maca asmi i t-yeṭṭef lḥal, terra-tt tmara, tura aḍris-ines amezwaru deg useggas n 2015, anida i d-teglem taddart-is. Aḍris-agi tesɣeṛ-it i yinelmaden-is n tesnawit.
Inelmaden-is n tesnawit, seg mi ɣran aḍris n tsemadt-nsen, ihwa-asen mačči d kra, yerna snemren-tt. Anect-agi yerna-as-d tabɣest d ufud i wakken ad t-aru iḍrisen-nniḍen. Akka i d-tlul tedyant-is akked tira.
Deg waggur n fuṛaṛ n useggas 2017, taselmadt Samira, tekfa tira n yiwen n wammud n tullisin akked kra n yiḍrisen nniḍen. Tefka-t i useqqamu unnig n Timmuzɣa, tɣil ur yettɛeṭṭil ara ad d-yeffeɣ, maca zrin wussan, rnan wagguren, terǧa terǧa ulac d acu i d-ibanen. Syin tewwi-t ɣer teẓrigin n El Amel. Iɛeṭṭel ciṭ, maca deg waggur n meɣres 2018 yeffeɣ-d s wudem unṣib, s uzwel « Tilufa ».
Ugar aya taselmadt, tameskart Samira Ḥusini tettaru tikwal akka ciṭ n tmedyezt, akken daɣ i tettkemmil deg tira n yiḍrisen d tullisin, mazal tettheggi iṣenfaren-nniḍen ara d-yeffɣen sya ɣer zdat. Ussan yezrin tettwanced ɣer kra n tesgilin, gar-asen-t tinna n TQ5 i ɣef yella mass Racid At Ɛli Uqasi d imḍebber amezwaru.
