Mačči d yiwen, mačči d sin i yerfden anay n umennuɣ ɣef Teqbaylit, yal yiwen d acu n uḥric i yeḍfer. Yiwen s tineɣt, wayeḍ s ccna, wihin s tmedyezt, wiyaḍ s unadi, … Akken daɣ llan wid yezdin akk iḥricen-agi n umennuɣ, ad ten-tafeḍ yal akud deg unnar. Gar yirgazen-agi yella unaẓur Brahimi Lxeyyeṛ
Ilul deg deg wass n 16 di yulyu n useggas 1961, di temnaḍt n Wayt Smaɛel. Seg temẓi-s iḥemmel taẓuri d wayen akk icudden ɣer yisles n Teqbaylit, d aya i t-yewwin ad yili d aɛeggal deg tiddukla tadelsant Adrar n Fad, din yeqdec tazmert-is.
Yekcem deg umaḍal n tsekla s tmedyezt-is yemgaraden deg yisental. Tamedyezt tger-it anda nniḍen, teldi-as-d tawwurt iwakken ad d-inadi awalen iqburen n tutlayt tayemmat “Taqbaylit”, i wakken ad ten yeseqdec deg yisefra-s.
Mass Brahimi yessefra γef waṭas n temsal, d wayen iy-as d yezzin, ama γef tutlayt, tameṭṭut, tamurt, tayri, uguren n tmetti, tajaddit, yerra tijmilin, d wayen-nniḍen, rnu γer waya yettili deg tiɛad-at idelsanen d yisaragen i d-suddusent tdukliwin tidelsanin di tmurt n Yiqbayliyen.
Yekki deg xilla n temlilyin d tfaskiwin n tmedyazt i d-yettilin di tmurt n Yiqvayliyen, ama deg: At Smaɛel, Aqbu, Ferɛun, At Ziki, Timizar, d wanda-nniḍen. Di temliliy-agi yewwi ddeqs n warrazen, gar-asen: arraz amenzu n tfaska « Kamal Buɛemmara » i d-yellan deg tsedawit n Bgayet, deg useggas n 2009
Ugar aya, mmi-s n Ayt Smaɛel ixeddem tafsart (Exposition) i yidlisen i yettwarun s Teqbalit. Deg tama d adellel, di tayeḍ i wid i yebɣan ad d-yaɣ. Akken daɣ i ixeddem taklut (Peinture), anida i d-iwṣef aṭas n yizumal n Timmuzɣa, akked wansayen d tudert n Yiqbayliyen. Aḥric i ten-yugaren akk, Dda Lxeyyeṛ yewwi abrid n unadi, ama deg wanyasyen, neɣ deg tgemmi d wayen nniḍen.
Isallen i d-yewwḍen tineggura-agi, mass Brahimi, yettheggi yiwen n umawal n temnaḍt n Wayt Smaɛel, akken i t-mazal yettaru tamedyezt, ixeddem taklut, ɣas ma yedda deg leɛmeṛ.
Rnu γer-s, yessaẓreg-s sin n yidlisen, mazal kra n yimedyaten ttnuzun deg tnedlisin, akken daɣ i mazal kra ɣer umaru, wid i ten-yettnadin zemmren ad s-ǧǧen izen s ttawil n uzeṭṭa n Facebook.
Idlisen i d-yessaẓreg :
-Yal azamul yesɛa azal, (anadi) – 2010
-Tisit n udrar n fad, (ammud n tmedyezt) – 2015
Awal γef udlis “Yal azamul yesɛa azal”
“Yal azamul yesɛa azal” d adlis amenzu n umedyaz Brahimi Lxeyyer, yeffeγ-d deg useggas n 2010, s lmendad n tiddukla tadelsant “Adrar n Fad” n temnaḍt n At Smaɛel. Iga-s tazwert mass Zahir Meksem i yellan d aselmad deg ugezdu n tutlayt d yidles amaziγ n tsedawit n Ʃebdereḥman Umira.
Leqdic-agi d ammud n yizamulen n rreqem n yiqnucen, n tama n Wayt Smaɛel. Mass Lxeyyer inuda γer temγarin, yesteqsa tulawin, i wakken ad yeskfel wa d yessegzi anamek n yizamulen-agi.
