Deg taggara n waggur n meɣres n useggas 2019, i d-yeffeɣ wammud amezwaru n tmedyazt Fahima Sediri, ɣer teẓriin n Ccix Muḥend Ulḥusin. Tefka-as azwel : « Tiqeclalin n tikta ».
D ammud deg-i d-ddan ṭam (08) n yisefra akked ṭam n wununɣen, tebḍa-t ɣef 72 n yisebtar, yettnuzu s 250 n yidinaren di tnedlisin n tmurt Taqbaylit. Unuɣen i d-yeddan daxel n wammud akked d wunuɣ n tduli d illi-s n massa Fahima i ten-ixedmen, ssawalen-as « Fadwa ».
Ciṭ seg tmeddurt n tmedyazt
Tlul Fahima Sediri deg wass n 13 di mayyu n useggas 1973, d illi-s n taddart n Yigufaf, i yeṭṭafaren taɣiwant n Wayt Yeḥya, di temnaḍt n Micli. Seg mi tella d tamecṭuḥt tḥemmel taẓuri d wayen akk icudden ɣer yidles n Yiqbayliyen.
Tebda tettaru isefra deg yiseggasen-nni n 1990, asmi tesɛa 17 n yiseggasen deg tudert-is. Maca ur as-tettunefk ara tegnit ad d-tikki deg kra n tfaska neɣ d timlilit almi d aseggas n 2010, deg useggas-agi i tekki s wudem unṣib deg tfaska n Yusef Uqasi d Si Muḥend Umḥend.
Syin d afella ldint-as-d tewwura, tettiki anida nniḍen. Am: Tfaska n udrar n Fad, deg Wayt Smaɛel, tafaska n Wat Leqṣer di Tubiret, tafaska n Itri Adelsan n Weqbu, tafaska Taẓuri d yidles (Art et Culture) di Lezzayer, … d waṭas nniḍen n temliliyin.
Txuleḍ aṭas n yimedyazen d tmedyazin, am: Mebarek Gamara, Ɛmer Belqada, Belqasem Sikadir, Lilya Seɛdi, Kaysa Xalifi, Ɛli Menas, Ḥmed Xeṭṭabi, d waṭas nniḍen n wudemawen n tẓuri. Ugar aya massa Sediri tɛeddad-d deg umussu asduklan, temmuɣnes, teqdec d taɛeggalt, gar-asen-t tiddukla « Taflest », i d-yessuddsen aṭas n temliliyin.
Akken daɣ i as-tettunefk tegnit tettwanced ɣer yimaṭṭafen d tiliẓriwin n Teqbaylit. Texdem ddeqs n yisaragen ɣef tmedyezt d yidles s umata. S kra n wanida ara tettwanced werǧin i tessɛuẓeg i tiɣri.
Deg useggas n 2018, tesbed-d nettat d umedyaz Mebarek Gamar, axxam n teẓrigin « Ccix Muḥend Ulḥusin ». Ssaẓergen-d xilla n yidlisen, ama d ammuden n tmedyezt, ungalen, tullisin, timucuha, timezgunin, d wayen nniḍen. Fkan tallelt i waṭas n yimeskaren d yimedyazen i wakken leqdicat-nsen ad d-walin tafat.
Fahima Sediri, tessefraw ɣef waṭas n tlufa d yisental, tefka amur i tayri d tmurt, tameṭṭut d tmetti, terra tijmilin i yizul n Teqbaylit d Timmuzɣa. Tekki di kra n tezlatin s « Duo », akken daɣ i tefka aḍris i ucennay Nuṛeddin Mesɛudi, azwel-ines « Fkiɣ-am ul-iw awi-t ». Yeffeɣ-d d aklip, yettwazuzzer di youtub d facebook. Deg yiseggasen-agi ineggura terna tettaru ula d tullisin. Rnu ɣer waya, tesɛa aṭas n yisenfaren, gar-asen asiẓreg n wammud-ines n tmedyezt, iwemi tefka azwel « Amadwan ».
Kra seg warrazen i s-yettunefken :
- Arraz n tmeṭṭut, di tfaska n Yitri Adelsan n Uqbu, deg useggas n 2011
- Arraz n tmeṭṭut, di tfaska n Udrar n Fad (Ayt Smaɛel), deg useggas n 2013
- Arraz wis kraḍ, di tfaska n Udrar n Fad (Ayt Smaɛel), deg meɣres 2017
- Arraz amenzu, di tfaska n At Leqṣer (Tubiret), deg yebrir 2017
- Arraz ameznzu, di tfaska Art et Culture, (Alger), deg ctembeṛ 2017
- Arraz wis kraḍ, di tfaska n Yitri Adelsan n Uqbu, deg dujembeṛ 2017
- Arraz wis sin, di tfaska Art et Culture (Alger), 2019 (tekki s tullist « Azal n Tlelli »)
