S tezlit-ines « Mi ara d tkecmeḍ deg ddhen-iw », yekka-d yisem-is akk i temnaḍin n tmurt Taqbaylit, snen-t akk yilemẓiyen, yesṭerḍeq asmel n youtube akked yizeḍwa inmettiyen.
Isem-is Saɛid Yefnayen, ilul deg wass n 12 deg fuṛaṛ n useggas 1983, deg temdint n Bgayet. D mmi-s n lɛeec n Yifenayen, i yeṭṭafaren tamnaḍt n Leqṣer. Yekcem annar n ccna d tẓuri deg yiseggasen n 2000, maca almi d aseggas n 2005 i as-tettunefk tegnit ad yessuffeɣ aḍebsi-ines amezwaru.
Ilemẓi Saɛid d win icennun ɣef waṭas n yisental d temsal, icennu s tugget ɣef tayri, d wuguren n yilemẓiyen, akken daɣ i yefka amu i tezlit n tmeɣriwin, timetti, d tudert n yal ass. Yetterḍeq deg useggas n 2014, s tezlit « Mi ara d-tkecmeḍ di ddehn-iw », mi d-yessuffeɣ aḍebsi-ines wis semmus (05) i wumi yefka azwel « Ɣas ṛuḥ ».
Aḍebsi-agi ddant-d deg-s sḍis n tezlatin, s yizwal-nsent : ɣas ṛuḥ, ɣer ṛebbi tɛenniɣ, mm teɛyunin, a tin a tin, a win i kem-iwalan, mi ara d tkecmeḍ deg ddhen-iw.
Ugar aya, mmi-s n temnaḍt n Ṣumam, yettwanced ɣer waṭas n tedwilin n tiliẓriwin d yimaṭṭafen n Teqbaylit. Akken daɣ i yexdem xilla n yibarazen {Concerts}, ama di tmurt n Yiqbayliyen, neɣ di Luṛup.
S kra n wanida yettwanced, yerra i tiɣri, s tumert i yettṛuḥu ɣur-sen. Yekki deg waṭas n tmeɣriwin n usfuggel n useggas amaynut, Yennayer, asmekti n tedyanin n 1980 d tefsut taberkant, d waṭas nniḍen.
Akka tura, Saɛid Yefnayen, yettheggi 04 n yeklipen di Lpari, akken daɣ i yettheggi i waṭas n tmeɣriwin anida ara d-yezzi akk i tmurt n Fṛansa, syin ad t-yekfu s tmeɣra di tzeqqa i yettwsnen nezzeh « Zénith », tayeḍ di « Le cabaret sauvage ».
