Tuqqna {Coordination} n umussu n Ufraniman i Tmurt n Yiqvayliyen MAK-ANAVAḌ n tesdawit n Vgayet, tessawel-d i Yiqvayliyen s umata, inelmaden ladɣa, ad d-rren i tiɣri i tigawt ara d-yilin ass 22 deg waggur-agi n dujembeṛ n useggas-agi.
Agraw-agi {Rassemblement} ad yili sdat n tesdawiyin Ɛebdeṛeḥman Umira, i yellan deg Terga n Uzemmur (Vgayet), ɣef 13h n tmeddit.
Iswi n ugraw-agi d iveddi ɣer yidis n umeɣnas n timunent d usdawan Riyaḍ Ḥamcac, akked yimeɣnasen nniḍen n taluft Taqvaylit, gar-asen amaru-aselmad Yeḥyun Lɛerbi.
Imeɣnasen-agi ceggɛen-asen-d ad d-ttwacarɛen deg uxxam n teɣdemt n temdint n Yemma Guraya, i wass n 31 deg waggur-agi n dujembeṛ, ɣef yiwet n temsalt i yettuɣalen ɣer useggas n 2016, imi imeɣnasen-agi n timunent, xedmen yiwet n tikli anida i d-beggnen ibeddi-nsen ɣer yidis n umeɣnas n At Mẓab « Kamal Ddin Fexxaṛ », akken daɣ i ssutren ad d-tili tlelli-ines di tallit-nni.
I usmekti, seg mi d-yeffeɣ yisalli-agi, imezdaɣ n At Rzin deg At Ɛebbas, suddsen iman-nsen, xelqen-d yiwet n tuddsa i yiveddi ɣer yidis n yilemẓi, asdawan Riyaḍ Ḥamcac, imi netta n temnaḍt-agi. Rnan xedmen kra n tigawin iwakken imdanen ad gzun taluft, w’ad d-rnun ɣer-sen ula d nitni.
Yenna yiwen n yilemẓi i yellan d aɛeggal di tuddsa-agi: « Riyaḍ, d ilemẓi d wawal, yexḍa i texnanasin, d mmi-s n Teqvaylit d tlelli, amennuɣ-ines zeddig. Ɣef waya nekkni s Yiqvayliyen n At Ɛebbas ur nettaǧ’ara ad yeɣli gar tuccar n udavu azzayri amharsan« .
