Ṭaleb Rabeḥ, ilul deg useggas n 1930 di taddert n Tiziṭ, i yettfaren lɛeṛc n At Yillilten, agezdu n Tizi Wezzu. Tewwi-t tmijalt deg wass n 22 n wayyur n dujember deg useggas 2015, ɣef tudert n 85 n yiseggasen.
Deg useggas 1950, mi yesɛa 20 di tudert-is, yewwi abrid ɣer yinig. Yers deg ugezdu n Moselle, di Fransa. Dinna i ixeddem deg yiwen n luzin almi d aseggas n 1956. Di luzin-nni i yeḍfeṛ yiwen n umẓawan{musicien} d Amẓabi, ssawalen-as « Ḥamid U Mẓabi », i yellan di tallit-nni yekkat agambar i Sliman Ɛazem d Ccix Lḥesnawi.
Deg useggas 1955, yekki di tedwilt n yimaswaḍen{amateurs} i yesselḥay imir-nni Ɛemṛawi Misum di ṛṛadyu n Paris.
Syin yekcem deg tfidiṛalit FLN n Fransa, anda i d-yefka tallelt i tegrawla, ama s tedrimt ama s yisallen. Maca leqdic-is deg tfidiṛalit ur as-yelli ara d ugur i ccna. Deg useggas 1959 yesekles tizlit-is tamenzut « Ifukk zzit di lmesbeḥ » i yeqqimen tettwassen ar ass-a.
Ṭaleb Rabeḥ, d win ixulḍen ayen din n yicennayen Iqbayliyen d yibeṛṛaniyen, gar-asen : Sliman Ɛazem, Ḥmed Ḥemmu, Ccix Lḥesnawi, Ṣaleḥ Seɛdawi, Akli Yeḥyaten, Farid El Aṭrec, Muḥemmed El Ǧamusi d waṭas nniḍen. Syin ɣer da, ixuleḍ ula d inaẓuren n tallit n 1960-1970, gar-asen Feṛḥat Mhenni, d Lewnis At Mengellat. Yerna yekki deg waṭas n tekliwin d leqdicat n Umussu Adelsan Amaziɣ « MCB ».
Ṭaleb Rabeḥ, yeḥbes amecwaṛ-is n ccna deg useggas n 1990. Yesekles ugar n 150 n tezlatin, s yisental yemgaraden. Gar tezlatin-is yettwassnen nezzeh: Ay amalu, Ay aqjun kečč d aḥbib-iw, Ay aɣrib yeǧǧan tamurt, Ttnadiɣ ɣef zzher-iw, A lfen, Yekfa nnif, Ad yili Ṛebbi d mmi, Wiyak a bnadem, A yisem ɛzizen a Micli, Lmacakil ya lmacakil, Ṭṭiṛ lqefṣ,… d tiyaḍ tal tizlit s tedyant-is d yizen-is.
