Deg kra n wussan kan ɣer deffir i d-yeffeɣ wammud n tmedyezt n umaru Fuḍil Lwennas, ɣer teẓrigin Imru, i yellan deg yiɣrem n Tizi Wezzu. Yefka-as umedyaz azwel « Tiqqit n tafat ». Ihegga-t aṭas aya, maca ur yesɛi ara allalen swayes ara d ti-d-yessuffeɣ. Deg ussan i d-iteddun ad yettwazzuzer deg yal tinedlisin n tmurt Taqbaylit.
Ilemẓi Fuḍil Lwennas iwemi ssawalen daɣen Ɛmeṛ Weɛli, ilul deg wass n 15 deg waggur n ɣuct n useggas 1990 di taddart n Sanana, i yeṭṭafaren taɣiwant n Tizi Ɣennif, di lɛerc n Yiflisen Umellil.
D amedyaz, d amaru s tutlayt Taqbaylit. Yekker-d deg yiwet n twacult i yefkan azal i yidles d tẓuri, d kra n wayen icudden ɣer Teqbaylit d Timmuzɣa. D aya i d-yeǧǧan s timmad-id ad yeḍfer abrid-agi n tira d tmedyezt.
Ass n 27 di ɣuct n useggas 1995, asmi i yesɛa semmus n yiseggasen deg tudert-is, teḍra-as yiwet n tedyant, terra-t d ameɛḍur i lebda. Yella sdaxel n tkeṛṛust, netta d jeddi-s d rebɛa-nniḍen n yiɛeggalen n twacult-is, teddun-d ɣer Uqbu, maca mi d-ɛeddan di Leɛǧiba i yeṭṭafaren Tubiret, tneqlab tkeṛṛust-nsen, tegla-d s lmut n jeddi-s, ma d agrud Fuḍil iṛuḥ-as yiẓri, tensa tafat-is. Ɣas ma ssawḍen-t ɣer sbiṭar, maca lixṣaṣ n wallalen ur tufiḍ d acu i as-d-xedmen yimejjayen.
Akud izerri, Fuḍil yettimɣur, asmi yeḥṣa s tedyant-is ur yuyis ara, yesɛa tabɣest, yeččur d asirem. Deg useggas n 1999 yekcem ɣer uɣerbaz n wid ur neẓẓar ara i yellan di Buxalfa.
Leḥmala i yefka i uḥric n leqṛaya teǧǧa-t ad d-yawi akayaḍ-ines n bakaluṛiya deg useggas n 2013. Syn yefren tasdawit n Ben Ɛeknun, dinna i yeḍfer aḥric n tɣamsa, ikemmel almi i d-yewwi licence, syin yewwi-d agerdas n mastère.
Yebda tira n tmedyezt d yiḍrisen yemgaraden dg useggas n 2005, di tallit-nni ur ixemmem ara ad d-yessuffeɣ adlis, yettaru kan i yiman-is. Maca mi yettimɣur mɣuren-t tektiwin-ines, s tallelt d usebɣes n twacult-is d yimeddukal-is, yebges yessaẓreg-d ar tura kraḍ n yidlisen n yiɣaniben yemgaraden, yessuffeɣ-d yakan : ungal, tullizin, akked wammud n tmedyezt.
Idlisen i d-yessaẓreg
Tajeǧǧigt n teẓgi, ungal, 2017
Tudert d asirem, tullizin, 2017
Tiqqit n tafat, ammud n tmedyezt, 2020
