Mulud Mɛemmeri neɣ Dda Lmulud akken i as-sawalen Yiqbayliyen, ilul deg wass n 28 di dujembeṛ n useggas 1917, di taddart Tawrirt Mimun, i yeṭṭafaṛen ass-a taɣiwant n Wat Yenni.
Di temẓi-s yelmed deg uɣerbaz n taddart, almi d aseggas n 1928, mi yesɛa 11 n yiseggasen yewwi abrid ɣer xali-s i yellan Rbaṭ di tmurt n Lmerruk. Dinna yeqqim ukuẓ n yiseggasen, syin yuɣal-d ɣer tmurt, ikemmel almad-ined deg uɣerbaz iwemi sawalen di tallit-nni « Bugeaud”, aɣerbaz-agi yella di temdint n tmurt n Lezzayer.
Mi yekfa di « Bugeaud » yewwi abrid n yinig, yers deg temdint n Lpari iwakken ad d-ikemmel leqṛaya-ines deg uɣerbaz n “Louis-le-Grand”, bac akken ad d-yeffeɣ d aselmad wa d-yuɣal ɣer tmurt ad yesɣer. Maca ur as-tettuneft ara tegnit ad d-yuɣal armi d aseggas n 1947, acku di tallit-nni yetterḍeq ṭṭrad agraɣlan wis sin.
Mi d-yuɣal deg waggur n ctember n useggas-agi n 1947, yerra srid ɣer uḥric n uelmed deg yiɣerbazen n Lemdiya akked Ben Ɛeknun. Deg useggas n 1952 yessuffeɣ-d ungal-ines amezwaru, iwemi yefka azwel : La Colline oubliée (Tawrirt yettwattun). Akken iikemmel aselmed almi d aseggas n 1957, imi yeqwa lḥeṛs d yimenɣi di tmut, yunag i tikelt-nniḍen ɣer tmurt n Lmerruk, yuɣal-d dei taggara n useggas 1962.
Dda Lmulud yezdi gar uselmed, tira d unadi. Seg useggas n 1965 ɣer 1972 yesselmed Tamaziɣt deg tesdawit n Lezzayer, aṭas iwemi i yeldi allen, ɣas ma di tallit-nni llemden-tt kan kan war ma yella ugerdas neɣ d aswir. Seg useggas n 1976 ɣer 1980 iɛedda-d d imḍebber ɣef unammas (Centre) CRAPE.
Deg useggas n 1980, mmi-s n Tewrirt n Mimun, yessuffeɣ-d adlis yefka-as azwel : « Poèmes kabyles anciens » (Isefra iqbuṛen n Leqbayel), d adlis i d-yellan deffir n tnekra d tefsut n Yimaziɣen. Acku di tallit-nni inelmaden n tesdawit n Tizi Wezzu, necden-d Dda Lmulud ad d-yexdem asarag ɣef udlis-ines. Aya-gi ur teqbilen wid yeṭṭfen adabu.
Deg useggas n 1982 di Lpari, amusnaw yeslul-d « Anammas n tezrawin d yinadiyen n Tmaziɣt » (CERAM),akked tesɣunt « Awal ». Di kra n wussan yuɣal-d ɣer tmurt, yeṭṭwaṭṭef deg unafag n Lezzayer netta akked Ferḥat Mhenni. Di kra tallit serrḥen i Dda Lmulud, ṭṭfen Ferḥat, maca amusnaw d win yurǧan ad d-sserḥen i unaẓur.
Deg useggas n 1988, yettunfek-as uzwel n « doctorat honoris causa » deg tesdawit n la Sorbonne. Dda Lmulud yettwanɣa deg wass n 26 furaṛ n useggas 1989,deg Ɛin Defla, mi d-yuɣal seg tmurt n Lmerruk deg yiwen n leqdic di tesdawit n Wejda.
Adabu aɛrab n Lezzayer, yessuffeɣ awal d akken d ttejṛa i t-yenɣan, maca Iqbayliyen, ḥṣan, umnen belli d adabu i t-yenɣan. Dda Lmulud yettwamḍel di taddart-is, deg wass n 28 furaṛ.
Ɣas zrin 31 n yiseggasen ɣef tmenɣiwt-is, maca Iqbayliyen, d Yimaziɣen s umata ur tettun ara, mazal rezzun ɣur-s, ttaran-as tijmilin, uran fell-as idlisen, ssefran, cnan fell-as, d waṭas n tezrawin, tasdawit d uxxam n yidles n Tizi Wezzu wwin isem-is.
Dda Lmulud deg tudert-is, yura idlisen aṭas n yidlisen, yexdem tasekla, igmer-d tigemmi, yessuffeɣ-d ungalen, yura timezgunin d tullizin, yexdem xilla n yinadiyen, … Ɣef Dda Lmulud ma nehḍer-d ur nkeffu.
