Deg ussan-agi yezrin Tasbeddit Takanadit i Tmaziɣt « Tiregwa » tberreḥ-d s tegmert n tedrimt (Levée de fonds) s ttawil n tkebbanit n « Gofundme ». Tigawt-agi tseqqdac-itt Tiregwa yal taggara n useggas, di kra n tzeqqa di Kanada, anida i d-temlilin yiɛeggalen, imeɣnasen, inaẓuren, d yimɛelmen. Din i d-ttaken tallelt i tuddsa-agi.
Maca aseggas-agi imi mazal aṭṭan kuṛuna, tallit n ukman ur ɛad tezri, iɛeggalen n Tiregwa, sqedcen tatiknulujit d internet. Gran-d tiɣri i Yiqbayliyen d wid iḥemmlen tasekla, d wat tedrimt iwakken ad d-fken tallelt s wayen zemmren d wayen bɣan, deg yiswi n usnerni n tsekla Taqbaylit.
I usmekti Tiregwa, Tasbeddit Takanadit i Tmaziɣt tlul-d deg useggas n 2012, dɣa seg yimir-nni nettat deg unnar n leqdic. Ar tura teslul-d kraḍ n warrazen iseklalen, amezwaru d arraz n tullisin iwemi fkan yiɛeggalen : Arraz n Belɛid At Ɛli, syin d arraz n Racid Ɛellic i wungal, ilindi rnan-d arraz n Ṭawes Ɛemṛuc i tsekla n yilemẓiyen.
Ugar aya at Tiregwa, ssuddes-d aṭas n tejmilin i yimeɣnasen, imyura d yinaẓuren n Teqbaylit, gar-asen : Yidir, Ferḥat Mhenni, Ɛeṣṣam Mulud, Kamal Ḥemmadi, Ideflawen, … d waṭas-nniḍen n wudmawen. Akken daɣ i d-necden ɣɣer yisaragen ddeqs n yineggalen, imeskaren, imeɣnasen d yisertiyen.
Iqbayliyen, Tiqbayliyin i yettidiren deg umaḍal, i yebɣan ad d-fken afus n tallelt, yesfek fell-asen ad rzun ɣer tansa-agi.
