Yeffeɣ-d uḍebsi amaynut n unaẓur Malek Baci, s wudem unṣib ass-nni n 27 di dujember 2020. Asidi-agi ddant-d deg-s 09 n tezlatin, s yisental-nsent yemgaraden, d uẓawan-nsent ḥlawen. Izwal-nsent : 1. Tajmilt – 2. Yaɣ ak-iniɣ – 3. Awal-iw – 4. Idles aɣeṛfi – 5. Tizi wezzu – 6. Ttrunt wallen-im – 7. Taninna – 8.Udem-is – 9. Targit. Aḍebsi-agi ifka-as unaẓur azwel » Tizi Wezzu ».
Aḍebsi-agi n mass Baci, yeffeɣ-d ɣer uxxam n teẓrigin » El VAZ », i yellan deg taddart n Mezgen, di temnaḍt n Buzgan (At Wizgan). Akka tura yettnuzu di kra n tḥuna n yiḍebsiyen di Tizi Wezzu d Yiɛeẓẓugen, di leɛḍil ad d-yaweḍ ɣer tamiwin-nniḍen.
Aṭas i yekkin deg usekles n uḍebsi-agi, yal yiwen d awu-t umḍiq i yeṭṭef, gar-asen : Ḥemudi Leḥlu, Qasi Ferḥat, Nurya, Saɛid Kermas, Yasin Ḥeddad, Yusef Ḥaǧ Saɛid, Tinhinan Sak, d wiyaḍ. Ma d iḍrisen i d-yeddan deg-s, tugget seg-sen n unaẓur s timmad-is, imi ula d netta d amedyaz, maca yekki daɣen Takfarinas Nayt Ceɛban akked Musuni Ɛebdella.
Ciṭ seg tmeddurt n unaẓur
Ɣas akken amahil-ines deg uḥric n tujjya, maca aya-gi ur as-yelli d ugur, neɣ ad yestaxeṛ ɣef tẓuri. Yebḍa akud-ines gar uxeddim-ines akked tmedyezt d uẓawan. Ur d-yessuffeɣ ara aḍebsi neɣ tasfift almi yesɛa 34 n yiseggasen deg tudert-is. Maca yella icennu deg tfaskiwi, d temliliyin tidelsanin, yettiki aṭas n tikkat s ccna-ines mi ara d-tili tigawt n usmkti n tedyanin n tefsut n Yimaziɣen, Yennayen neɣ d tijmilin, … d waṭas-nniḍen.
Seg temẓi-is i iḥemmel ccna d uẓawan, yettak tameẓẓuɣt nezzeh i tezlatin d yicennayen i yecban : Feṛḥat, Yidir, Takfarinas, Igrawen yecban Abranis, Ideflawen, … d waṭas-nniḍen.
Malek Baci, d win isefrawen, icennun ɣef xilla n yisental, gar-asen : Tayri, tudert n yal ass, tamurt Taqbaylit, beṭṭu d leḥzen, aktayen d tatut, idles d ugdud-ines yettwaḥeqṛen, … d wayen-nniḍen.
