15 n yiseggasen ɣef tmettant n Brahim Izri, itri n tezlit taqbaylit tatrart

,

Brahim Izri, ilul di taddart n At Leḥsen, deg lɛeṛc n At Yenni, agezdu n Tizi Wezzu, deg ass n 12 yennayer, aseggas n 1954. Asmi yewweḍ 07 n iseggasen deg tudert-is, yevda yetturar s snitra. D win ilemden aẓawan di zzawiya n jeddi-s Lḥaǧ Belqasem.

Avrid n ccna

Asmi yekcem ɣer tesnawit n Larevɛa n At Yiraten, yezga yeddukkul netta d Ɛaziz Berahma akked Nayt Ɛebdelεaziz, dɣa din i d-snulfan agraw n ccna, iwemi fkan isem « IGUDAR ».

Di tallit-nni aṭas n yigrawen n ccna tamḥaddit i yellan, zgan d amennuɣ ɣef tnekkit d yidles Amaziɣ, gar-asen : Isulas, Imaziɣen Imula, Les Abranis, Inaṣliyen, d wiyaḍ.

Brahim Izri d win i yefkan afus n tallelt i waṭas n yicennayen n teqvaylit, yella d afus ayeffus n Yidir, send ad ikemmel ccna i yiman-is.

Deg yiseggasen n 70, mmi-s n At Leḥsen yewwi avrid  ɣer yinig, d tuffɣa-ines tamenzut ɣer tmurt n Fransa, anda ggten yiminigen Iqvayliyen. Dinna tettunefk-as tegnit yemlal d waṭas n yicennayen. Yezga yekkat snitra i Yidir, Lewnis At Mengellat akked Feṛḥat Imaziɣen Imula.

Syinn akkin yuɣal ula d netta icennu, ur yeqqim ara kan d amẓawan, yerna yesselmed timsirin n uẓawan. Akken-nni almi d aseggas n 1980, yekcem s astudyu yevda asekles.

Tasfift-is tamenzut teffeɣ-d deg 1981. Seg yimir-nni ur yeḥvis ccna. Iteddu sya ɣer da, yecna d waṭas n yinaẓuren, yexdem aṭas n yivarazen{concerts}. Deg useggas n 1999 Brahim yecna akked Yidir d Maxime Le Forestier, tizlit-nni « Tizi Wezzu ».

Deg tefsut taverkant

Deg tefsut taverkant n tmurt Taqvaylit (seg yevrir 2001), Brahim Izri yunef i ccna, yewwi avrid n umennuɣ asertan, yefren annar, am netta am tugget n Iqvayliyen. Yemmuɣnes deg umussu aɣerman n Leɛṛac. Yerna d win yefkan akud-is d tezmert-is i tallelt n yilmeẓyen i d-yeffɣen mgal tusḍa n udavu azzayri.

Tamettant-ines

Brahim Izri testeqsa-d ɣur-s lmut deg ass n 03 yennayer 2005, ɣef tudert n 51 d aseggas, yemmut deg sbiṭaṛ n “Hôtel Dieu” di Lpari. Ssebba n lmut-is d yiwen n waṭṭan n diri i t-yeṭṭfen deg useggas n 2002. Yezga yeqqaz deg-s irennu, almi yegla yis-s.

Tisfifin i d-yessuffeɣ :

  • 1981 : Sacrifice pour un enfant ;
  • 1983 : L’Enfant de la terre ;
  • 1984 : D acu-iyi ;
  • 1986 : Ala, ala ;
  • 1988 : D ifrax i nella ;
  • 1995 : A lbudala.

Send ad yemmet, Brahim yekfa asekles n tesfift-ines taneggarut, yeǧǧa-tt-id d agerruj i Yiqvayliyen d Teqvayliyin, d acu kan mazal-itt ar ass-a ur d-teffiɣ ara, tettraǧu ass-is.

Retrouvez-nous sur notre page @Facebook et sur #Instagram ! Abonnez-vous à notre chaîne ►YouTube