Yeffeɣ-d udlis amaynut sɣur ameskar, amedyaz Akli Muhubi, di teẓrigin n Ccix Muḥend Ulḥusin. D tamɛayt azwel-ines »Tadyant n Yidir », ad naf tamacahut tt-in d-iḥekkun ɣef yiwen ugellid d amesbaṭli. D adlis iwumi yerna unuɣen, unuɣen sɣur tnaẓurt Ɛissu Ɛica.
Tazemmurt n tira n teqbaylit urǧin teεra, mi tesseɣli ifer ad d-lalen wiyaḍ deg umkan-is. Icuḍaḍ-is sya u sya εelqen ččuren d azemmur, tekna seg wayen tεebba. Akken ula d imyura, mačči d yiwen mačči d sin i d-yettlalen, d izli n wid-n yettarun, ttarun s teqbaylit, sidiren-tt, ssekfalen-d ayen yeffren deg-s. Akal n tsekla yellan d asuki, yekrez, imeggel, yezreε, yemɣi.
Tukkist
Yidir yettimɣur, yettissin amek tetteddu ddunit n yiɣersiwen di teẓgi, armi i d-yesnulfa iselsa s yiferrawen n yisekla, yerna yenjer-d yiwet n teṛweɣt yettawi-tt yid-s ; yebna yiwet n texxamt s usɣar i netta d yemma-s, anda ara d durqen seg tafukt n unebdu yesruɣuyen tafekka, d yigeffuren n tegrest i yessergigayen tigecrar d yifadden.
Akken i ikemmel tudert netta d yemma-s, Tasedda, deg talwit d tumert. Yal ass i irennu yettaf-d amaynut, yettaf-d kra n txentuttac i yesseqdac deg tudert-is n yal ass. Armi d yiwen wass, tuḍen yemma-s, Amek ara yexdem ? Nettat meskint teɣli ɣer lqaɛa, tettnazaɛ ; ma d netta ur yegzi tiqqit. Din i twehha i Yidir s uqerru-s ad d-yawi yiwet n tcekkart i teffer deg yiwen umkan, tettraǧu deg ass-is ad yaweḍ.
Tameddurt n umeskar
Akli Muhubi mmi-s n Bgayet i d-ilulen deg Uweqqas, taddart n Iɣil Wiss yellan di lεerc Ayt Buεisi. Ilul-d deg useggas n 1992. Deg wasmi yella d amecṭuḥ i yesmeɣnis, iḥemmel taqbaylit. Dayen i t-yeǧǧan ad yeddem imru akken ad yessefru. Isefra-ines jebbden ar uẓar n teqbaylit, tajaddit d wansayen i aɣ-d-ǧǧan imezwura.
Adlis-ines amezwaru yesssuffeɣ-it-id deg useggas n 2017. Xas akken ḥercaw ubrid n usiẓreg, maεna yedda ḥafi yeεfes deg ubuneqqar, akken tedda ḥafi teqbaylit acḥal d leqrun akken ad tidir. Ur yuyis ara yessufeɣ-d adlis-ines iwumi yefka azwel »Timuεay, seg tgemmi taqbaylit » yerna-d adlis-ines s annar n tsekla. Deg wadlis-agi ad naf ijmeε-d semmus n tmucuha n at zik, d timucuha i as-yeqqimen di ccfayat. Tazwart yura-yas-tt umeɣnas amaru Mass Nasir Meǧdub, tawlaft n tduli sɣur tnaẓurt Massa Ɛisu Ɛica.
Ciṭuḥ di tmeddurt n tnaẓurt Σica Σissu
Σica Σissu d yelli-s n taddart n Σeqqar, i yeṭṭafaren taɣiwant n Uweqqas agezdu n Bgayet. Tlul deg ass n 18 mayyu 1985. D tamsuneɣt, d tamedyazt Taqbaylit i issefrawen ɣef tmeṭṭut d tjaddit, izerfan d yiɣeblan. Tekki deg waṭas n tfaskiwin id yettilin deg tmurt. Tewwid agerdas n « Technologie alimentaire » seg tesdawit n Bumerdas (2005-2011).
