Deg wussan-agi yezrin i d-tverreḥ tnaẓurt-tilemẓit Nuṛya deg umiḍan-ines n facebook, s tuffɣa n uḍevsi-ines iwemi tefka azwel « A yelli ». Aneggaru-agi yeffeɣ-d ɣer uxxam n teẓrigin « Sirocco Record ».
D aḍevsi deg-i i d-ddant semmus n tezlatin, s yisental-nsent yemgaraden, s yizwal-nsent: 1. A yelli – 2. Lwennas – 3. Tadderfit – 4. A nekk i k-iḥemmlen – 5. Ansayen n tjaddit. Iḍrisen d uẓawan n uḍebsi-agi d Nuṛya At Weɛli i ten-ixedmen, siwa tizlit tis semmus aẓawan-is ixdem-it mass Smaɛil Xaldi.
Aṭas n yimẓawanen d yinaẓuren i yekkin deg usekles d usufeɣ n tezlatin-agi, gar-asen : Smaɛil Xaldi, Meḥfuḍ At Mexṭar, Ridu Nehaṛ, Yasin Ḥeddad, Ḥemza Besbas, Sandra Ḥmaydi, Mulud Ɛemṛan, Nabil Cirifi, Ɛebderrezaq Ḥennad, Deḥman Ben Deḥman, Silya Uld Muḥend, Yasmin Ṭaleb, Ṭawes Arḥab, Arezqi Weɛli, Lwennas Ɛemṛan, Mehdi Ḥamiti, d wiyaḍ yal yiwen s yisem-is.
Deg umiḍan-ines n fb, tanaẓurt Nuṛya tesnemmer akk imẓawanen, d wid akk yekkin deg usekles n tezlatis-ines, d usufeɣ n uḍebsi-ines. Deg taggara n yizen-ines tenna-d ad d-rreɣ tajmilt i wid d tid i yiḥemmlen i uzayez-inu (Mon public), ula d nekk ḥemmleɣ-ten.
