Deg wussan-agi yezrin i d-iberreḥ mass Mebarek Gamar, i yellan ɣef uqeṛṛu n uxxam n teẓrigin « Ccix Muḥend Ulḥusin » s tuffɣa n udlis n yilemẓi-asdawan Aẓenẓar, iwemi yefka azwel « Amedyaz n Agur ». D alis ara yettwazuzzren deg wussan i d-iteddun deg tnedlisn n tmurt Taqbaylit.
Ciṭ seg tudert n umeskar
S yisem-is n tedbelt Samir Terrak, maca yefka i yiman-is isem n tẓuri « Aẓenẓar ». Ilul deg useggas n 1994, deg taddart n At Ɛebdelmumen, di tɣiwant n Tizi n Ttlata, deg Iwaḍiyen.
Mi d-yewwi akayaḍ-ines n bakaluṛya, yefren tasdawit n Mulud At Mɛemmer, di Tizi Wezzu, din i yeḍfer tutlayt tafṛansit, yeffeɣ-d syin s ugerdas n licence. Deg kra n wakud, yewwi abrid n yinig, am netta am tuggett n yilmeẓyen Iqbayliyen, yers di Lpari,yettkemmil tizrawin-ines di tesdawit n Sorbonne.
Ugar aya ilemẓi n id-tefka taddart n A Ɛebdelmumen, yefka azal i tira, d yidles nTeqbaylit, d aya i t-yeǧǧan ad d-yessaẓreg adlis, akken daɣ i yettaru iḍrisen-nniḍen yemgaraden,ama ɣef tudert neɣ timetti s umata.
Tukkist seg udlis
Tecna-tt-id akken tlata tikkal, ula akken ur as-nesumneɣ ara i yimeslayen-nni iwumi ttḥulfuɣ belli imir-n kan i d-ttlalen. Ur as-tumneɣ diɣ i taɣect-nni n Ẓana, teẓẓuɣur-iyi, tjebbed-iyi. Ixuṣ kan ad medleɣ allen-iw, ad regleɣ targa n ixemmimen-iw iwakken d nettat kan iwumi ara selleɣ, dɣa ula d nekk s timmad-iw ad fsiɣ, ad uɣaleɣ d tunṭiqt deg tgerjumt-is. Daya i bɣiɣ di ddqiqa-nni. Daɣnetta mi tfukk, teɛya seg wakken tefka-d akk tazmert-is taḥulfant deg-s, ṛuḥeɣ wwiɣ-as-d teswa aman sakkin ssutreɣ-as ad as-d-tales i tikelt-nniḍen.
