Studio Aksel iger-d tiɣri i yinaẓuren Iqbayliyen d kra n wid yebɣan ad d-kkin deg temsizelt tamezwarut n ccna n Teqbaylit s yiɣaniben yemgaraden, am s uɣanib n ceɛbi, atrar neɣ d ayen-nniḍen.
Wid d tid iran ad kkin(t), yewwi-d fell-asen(t) ad d-aznen(t) tavidyut-nsen neɣ ɣer usebter n facebook « Studio Aksel » ɣer tansa-agi: studioaksel@gmail.com. I wugar n yisallen tzemmrem(t) ad tessiwlem(t) ɣer wuṭṭun-agi n tilifun : 06 98 94 15 22.
I usmekti, tarbaɛt n Studio Aksel, tebda teṭṭef tividyutin, tberreḥ-d s tiɣri-agi seg wass n 12 yennayer, ad temdel tiwwura-ines deg wass n 31 deg waggur-agi. Taẓrigt-agi tefka-as isem « Timsizelt n yennayer.
Iwakken ad d-tberreḥ terbaɛt n Studio Aksel s wid i d-yufraren deg temsizelt-agi, ad tserrs tividyutin n yimekkiyen azal n 10 n wussan deg yizeḍwa inmettiyen am Facebook d YouTube. Syin ad tefren tseqqamut n yinezzurfa seg kraḍ n seg-sent i d-yufraren iwalan yimdanen s waṭas.
Arraz ara yettunefken i win neɣ tin ara d-yufraren, ad yili d asekles n yiwet n tezlit d leklip-ines, akked tmuffirin-nniḍen. Akka i d-uran deg wulɣu i d-sersen deg usebter-nsen n FB.
I usmekti, adeg (Lieu) n Studio Aksel yezga-d deg taddart n Alma, i yeṭṭafaren taɣiwant n Yirǧen, tama n Wasif Ɛisi, di Tizi Wezzu. Ilul-d deg useggas n 2019, maca aṭas n yilemẓiyen i irezzun ɣur-sen iwakken ad skelsen, ama d aẓawan, ccna, iklipen, tamedyezt, d wayen-nniḍen.
