D ammud amezwaru n tmeɣnast-tamedyazt Faṭima Yassa-Aliane. Yeffeɣ-d di Fṛansa deg waggur n tuber n useggas n 2020, deg kra n wakud ad d-yeffeɣ deg tmurt n Yiqbayliyen. Tessuffeɣ-it tmeskart i demma n lal-is {à compte d’auteur}. D amaru-ameɣnas Muḥemmed Gaya i s-igan tazwert.
D ammud i tebḍa tmeskart ɣef 88 n yisebtar, ddan-d deg-s wugar n 60 n yisefra. Yesqam-d s 400 n yidinaṛṛen. Akka tura yettnuzu di kra tamiwin di tmurt n Fṛansa, di leɛḍil ad d-yekcem ɣer tmurt Taqbaylit.
Deg wammud-agi i tebda s usefru « Axxam aqdim« , anida terra tajmilt i uxxam n Leqbayel, tsedda-d deg-s ukuẓ (04) n yisefra ɣef unfafad n kuṛuna i yerwin amaḍal.
Abruy seg tmeddurt n tmeskart
Massa Faṭima Yassa, tlul deg useggas n 1941 deg taddart n Yibuyusfen, i yeṭṭafaren tamnaḍt n Wat Wizgan (Bouzguene), di tmurt Taqbaylit. D tin i yebdan tamedyazt mi tella d tilemẓit.
Deg yiseggasen n 1950 fkan-tt yimawlan-is tercel akked mass Ɛelyan Saɛid, yid-s i d-tesɛa sḍis (06) n warrac. Syin d afella guǧen ɣer Iɣzer Ameqqran. Din i ddren azal n 20 yiseggasen. Deg useggas n 1984 uɣalen-d ɣer Buzgan, din i tedder gar yisetma-s d yemma-s.
D tamettant n yemma-s i d-yessukin deg-s asefru, d uleqqem n wawal. Acku ṛṛwaḥ-is yeǧǧa-d deg-s adeddic ur nḥellu. Massa Faṭima deg tudert-is tessefra ɣef waṭas n temsal d tlufa, am : wansayen n Yiqbayliyen, ṭṭraḍ, inig, lḥif, tasertit di tmurt, d wayen-nniḍen.
Tenna deg yiwen n usefru, iwemi tsemma « Qessam aderɣal » :
Tebɛeɣ qessam ad t-nɣeɣ Ula anda ad t-afeɣ Yuli targa n yilili Ɣer cṛeɛ ad t-sbeddeɣ Ad t-mqabaleɣ Tadyant yesɛedda fell-i Ma walaɣ tizya-w ndeṛṛeɣ Wellah ur tẓulleɣ Yif-iyi uydi
