Iberreḥ-d Lounis Aït Menguellet s tmeɣra n ccna i 26 wamber 2022 di Paris

,

Isuffeɣ-d unaẓur Aqbayli Lounis Aït Menguellet deg usebter-is n Facebook tanazalt{affiche} tunsibt n usiḥar-is n ccna i t-yettraǧun ass n 26 wamber 2022 deg tzeqqa n Accor Arena di Paris.

Seld lɣiba iḍulen, iban-d ihi s wudem unsib yiwen n ttiɛad n ccna n mmi-s n Yiɣil n Wammas, di leɛḍil ad d-alint ahat tegnatin nniḍen sey-a ar wass-nni.

Yuɣ lḥal, d tazɣint{crise} tadawsant icudden i Covid-19 i yellan deffir n ubeṭṭel n temlilit n Lounis Aït Menguellet akked wid i t-iḥemmlen. D ayen yeḍran i waṭas n yicennayen deg umaḍal merra, seg ugar n useggas tura.

Ad d-nesmekti dakken yella iberreḥ-d umedyaz-acennay i uzayez s tmeɣra-a deg yiwet n tvidyut i d-yesres di internet ass n 12 yennayer iɛeddan. « Ssawlen-iyi-d nnan-iyi-d ma ad tqebleḍ ad txedmeḍ tameɣra deg 2022 di Accor Arena […]. Dɣa qebleɣ, nniɣ-as ad iseɣzef Rebbi tudert […] », i d-yenna unaẓur bu 71 n yiseggasen.

Ikemmel deg wawal-is di tvidyut-nni: « Ahat sey-a ar wass-n, ma ad ilint tmeɣriwin nniḍen, ur ẓriɣ ara […]. Meɛna tagi, atan ad awen-d-ɛeggneɣ si tura ».

Yelha daɣ ma nesmekta-d belli yella Lounis Aït Menguellet seg yinaẓuren i iwansen azayez-is m’akken inuḥ ukman, izehher coronavirus. Ddeqs n tvidyutin i d-izuzzer imir-nni di internet, netta icennu kra n tezlatin.

Si tama n yimdanen i yeṭṭafaren anaẓur-a ameqqran, aṭas umi yehwa yisalli n temlilit-a gar-asen, ulama mazal tḍul deg wakud. D acu, zemren xersum ad ḥerzen imeḍqan-nsen si tura s ttawil n internet, war zzirban d tazzla deg wussan ineggura.

Dɣa, yella wuṭṭun-a n tilifun i win yebɣan ad yesteqsi ɣef tal taluft: 06 14 33 76 59.

Retrouvez-nous sur notre page @Facebook et sur #Instagram ! Abonnez-vous à notre chaîne ►YouTube