Zrin tura 8 n yiseggasen segmi i aɣ-yeǧǧa umseḍru{réalisateur} n usaru amezwaru s teqbaylit deg umezruy. Wa d Ɛebderreḥman Bugermuḥ{Abderrahmane Bouguermouh}, i d-ilulen deg yiwet n twacult tazwawt ideg ababat d aselmad, ma d tayemmat d lall n uxxam.
Yekker-d di tallit n temhersa tafransist, yedder abeεda tidyanin n 08 mayu 1945 imi yella yeɣɣar di Seṭṭif. Mettwal 1957, yemyussan d Mulud At Mεemmer i yeqqimen d amdakkel-is seg yimir-nni. Syin akkin, deg 1960, yekcem ɣer Usudu{Institut} n tezrawin tifellayin tisinimaṭugrafiyin anda yelmed akk ayen yerzan aseḍru n usaru.
Deg 1965, isezga-d{il a adapté} ɣer teqbaylit yiwen n uḍris n Malek Ḥeddad, yerra-t-id d asaru alemmas s uzwel n « Am yiman »{Comme une âme}. Asaru-a yugi-t Uɣlif n yidles n Lezzayer imir-nni acku mačči s teεrabt i t-iga.
Seld tadyant-a, yuɣal ɣer Paris. Γas imuger-d ula dinna uguren, maca yedda akken ddan waman armi yufa iman-is akked wid icerken yid-s tikti n teqbaylit d tmaziɣt, am Ṭawes Ɛemruc, Muḥend Aεrab Besεud d Mulud At Mεemmer.
Seg useggas n 1965 armi d 1996, iga ugar n mraw n yiqeddicen isinimaṭugrafiyen, gar yifetrawen{documentaires} d yisura, gar-asen « Γerdaya », « Igḍaḍ n unebdu » akked « Tawrirt yettwattun » i as-d-yuwin asteɛref d wayendin n cciεa d uqader. Ɛebderreḥman Bugermuḥ d amaru daɣen. Seg yidlisen i yura ad d-nebder abeεda « Anza ».
Ilul Ɛebderreḥman Bugermuḥ deg Uzellagen (Bgayet) ass n 25 furar n useggas n 1936. Yemmut di 3 furar 2013.
