Tberreḥ-d tcennayt tilemẓit Lycia Nabeth{Lisya Nabet} deg usebter-is unsib n Facebook s tuffɣa n yiseɣrez{album}-is amaynu umi tefka azwel « Akka ad as-nruḥ», ɣer Aẓawan Production.
Γef wawal n tin yettwassnen ladɣa s tezlit « Err-iyi-d iles-iw », yeffeɣ-d walbum-a ass n 03 furar 2021 di Tmurt Taqbaylit s wudem n CD, akked internet i wid yettidiren deg kuẓ n tɣemmar n umaḍal, abeεda di Turuft{Europe} ideg caḍen Yizwawen. Di leεḍil ad d-yeffeɣ ahat deg CD ula di Fransa.
Ma nezzi-d ɣer tḥawact i d-tuwi tcennayt, ad naf deg-s 08 n yizwal i d-yusan akka di tduli: « Ssut », « Tiḥsilt », « Amxix-iw », « W’uffan », « Ad cnuɣ », « Yella Waya », « Memmi », « Akka ». Akken nezmer ad nefhem, mačči d yiwen n usentel i tesqerdec Lycia, maca tḥuza ula d idles d tmetti s wayen i tettidir.
Yelha ma nesmekta-d dakken tefruri-d Lycia Nabeth seg twacult n yinaẓuren, i d-yezgan deg Wat Leḥsen, Lɛerc n Wat Yenni. D yelli-s dɣa n ucennay Nabeth i igan ddeqs n yiqeddicen yelhan.
Ma ɣef wid yekkin deg yiseɣrez-a, ad naf Madjid Halit ɣer uqeεεed, Dahmane Bendahmane yurar imẓaḍ{violon} d ubanju. Tajawaqt yeddem-itt Djamel Benboucherite, abendir d Madjid HALIT akked Sofiane Hadjout. Taderbukt d Walid Bouhas, ma d tagiṭart d upyanu sɣur Madjid Halit.
Deg walbum-a i yettwaskelsen deg ustudyu Solfège tedda-d daɣen taɣect n Larbi Hadjout.
