Isres-d ucennay Iflis deg yiẓeḍwan inmettiyen, ass n 07 furar 2021, yiwen n uklip d amaynu s uzwel n « A Dda Meẓyan ». Asuffeɣ n uklip-a yella-d s lmendad n Yasin Messuya, ma d aẓawan d yimeslayen n tezlit d ayla n Iflis.
Ayen i d-yuwi s umata mmi-s n Yiflisen deg umaynut-a s tugna, d ayen icudden i yidles azwaw d usawki n medden ɣef tmagit d tdukkli.
Yeqqar dɣa, gar cwiṭ d waṭas, « Efk-iyi-d kan tilelli-w, ǧǧiɣ-ak ayen yellan. Ad tidir tmeslayt-iw, fkiɣ-ak imelyan ». Daɣen, tal tikkelt ad d-yales di tsetna i ufyir-a : « a Dda Meẓyan, ixef-is ur yeffir ; iban […]».
Deg uklip-a ad nwali anaẓur s tgiṭart-is, tikwal ibedd tikwal iqqim, deg yiwen n uɣawas{plan} n temlel d usenfel n tɣemmar n tiẓri. Ɣas ahat mačči s wallalen imeqqranen i yemmug, izen iɛedda akken iwulem.
I telɣut kan, tedda-d tezlit n uklip-a deg walbum aneggaru n Iflis « Où va ce monde », i d-isuffeɣ deg useggas n 2018. Yettnuzu akka tura ɣer tensa-a di Amazon.
Ilul Iflis di taddart n Tsennant, taɣiwant n Yiflisen, aseggas n 1970. Seg 1987, yebda amecwar-is n ccna deg yigrawen, armi d 1999, yunag ɣer Fransa, isemmed icennu weḥd-s ar ass-a.
